今仔日狗仔無聲（原來兩隻攏走無去矣）
聽著強欲共厝蓋giâ起來的笑聲
原來4个資深美女已經佇厝裡
我加入…..美女的陣容
上快樂的時陣，就是無禁無忌放膽笑大聲

攏講：茶著燒、查某著笑！
敢會使提來講阮這陣查仔人？

離開進前，請淨慧姐抔（put）寡塗予我
頂工丫昌老師送的黃梔仔花，著添寡仔塗才活會久。

經過斗南漁市橋跤遐
一欉苦楝仔開甲強欲爆炸
倚共翕相

花芳綴一路
想講，佇相片內底的花嘛會芳？
轉來到厝
皮包仔開開
原來皮包仔內底
有阿姐挽的兩蕊含笑花

**
sìn-suà=順便(有人講sūn-suà）