 
字體：小 中 大 |
|
|
|
| 2020/04/30 22:17:46瀏覽73｜回應0｜推薦2 | |
2019.03.06 中晝倒佇眠床略略仔瞇一下。
聽著郵差送批來巷仔的機車聲。 突然間規个人像倒轉去故鄉彼間竹管仔厝內底。 倒佇中間仔的總鋪，面向用一liau一liau差不多5公分闊做的柴窗仔，這馬想起來，彼个年代做木真gâu，無論天落偌濟雨，柴窗嘛袂因為澹濕徙振動，總是輕輕仔撥一下，欲開抑是欲關隨咱的意。 窗仔外口是一排竹bôo，有風的時，伊就大聲唱歌，無風的時，竹葉仔輕輕搖動，優美的舞步、難忘的歌聲。 彼个年代郵差騎鐵馬仔送批。 嘛是這款安靜的中晝時。罕罕矣一聲：張陳恩掛號！ 彼是阿爸對北部寄現金袋仔轉來予阿母，現金袋仔的批囊真特別，四箍圍仔用線紩起來，若像驚仔現金走予走去仝款。 收著現金袋仔，並無表示阮有錢通開矣。 為啥乜？ 阿爸本來佇田庄做穡，去北部做工。會當寄轉來的錢無濟，彼个現金袋仔，往往是無夠繳稅金佮醫我的跤欠人的醫藥費。 阮兜有足濟未完稅的稅單，一疊，佇阿爸的屜仔底，參阿爸初農時寫的劇本囥鬥陣，我印象上深的兩字漢字，應該是［田賦］這兩字，軟軟的單頂頭，定定有這兩字。到今、我猶毋知影做田人繳的［田賦］是啥。干但知影彼是萬萬稅之中的一種。 稅金欠siunn久，欠siunn濟，政府會派人來查封。無論房間裡阿母的嫁妝- -柴櫥、客廳阿爸的鐵馬仔佮豬牢壁頂貼一張。 黃黃的查封單仔貼咧，阮兜嘛袂生錢，所以猶是無繳。 後來，來一个講外省話的外省人，來坐佇中間仔，講啥阮聽無，經過厝邊一个聽有外省話的講予阮聽，才知影：今仔日若無收著欠稅的錢，伊坐佇遐無欲走。 佇阮驚甲毋敢哭出聲的時陣，阿母走去庄內共表叔借錢才解決。 頂工參朋友騎車去田尾，有轉去我出世的所在。 竹管仔厝、柴窗仔佮竹bôo，早就予歲月iûnn甲無痕無跡。阿維轉去種的幾欉仔樹仔。等樹仔大欉，欲轉來去樹仔跤起『小木屋』；這是阮的夢。 愈老、細漢時的記持愈清楚。 大概嘛會有一工，時間會將我腦海中的竹管仔厝iûnn掉。 *** 一liau一liau =一條一條 竹bôo=竹欉 欠siunn久，欠siunn濟=欠太多，欠太久 iûnn=溶
|
|
| ( 心情隨筆｜心靈 ) |
