阿爸煮食尤其講究。
年仔節仔ah是請人客，阿爸會佇灶跤煮甲足豐沛。
有一改阿爸欲糋蝦仔，我咧看電視。
阿爸先共一盤蝦仔佮一碗麵粉捧來客廳，叫我共蝦仔糊麵粉。
我共蝦仔糊麵粉了後，阿爸閣捧一碗麵包粉來，叫我共蝦仔閣糊一層麵包粉。阿爸講：愛黏予牢哦，落鼎落下糋才袂散去。
我足無耐心講：哪著糊遐濟項啦，毋是攏食落去！
阿爸略仔無歡喜講：遐無耐心！煮食加用寡仔心思，彼食物加偌有價值咧。
嘛有影，阿爸煮的物件，總是加真好食！
後來阿爸叫我鬥做啥，我攏毋敢加講話。
　
參哥哥開講，伊講伊做兵的時，阿爸會寫批予伊，上會記得的是阿爸共伊講：鳥之將起飛、不留痕跡！
哥哥講：足無彩！批攏無留咧。
其實記得頭殼內底，比共批留落來閣較珍貴！

我本來叫是阿爸干但參我寫批爾咧，原來伊嘛會寫予哥哥。

我佇仁愛學校的時，阿爸三不五時仔會寫批予我。
啊若彼句『鳥之將起飛、不留痕跡！』是我欲嫁進前，離職的時阿爸共我講的，伊講參同事交接著做予好勢，莫予人另日歹做代誌。

結婚進前佇事務所做8年，毋是［交接］兩字會當交待清楚的。會記得我來斗六兩年了後，猶閣捌接著事務所敲電話來問代誌。佳哉彼陣仔少年，代誌記較濟。

阮囝看我做代誌凊凊彩彩，捌共我詼，講怹外公一世人做代誌攏誠好勢，干但做著我這个查仔囝是『瑕疵品』！

昨暝夢中阿爸的笑容，我感覺伊對這个『瑕疵品』誠滿意！

自我感覺良好….足快樂！