2019.02.23

我的故鄉柳樹湳，本成是一个安靜的農村。
後來彼所在變成田尾公路花園的一搭。
　
參朋友出去𨑨迌（tshit-thô 遊玩），就會有機會轉去故鄉遊覽。
今仔日參朋友騎車出去耍，去到田尾仔的時，有人想欲佇卡拉ＯＫ唱歌、有人欲去賞花，阮就約束中晝佇遊客中心外口相等。

我參朋友去賞花，踅到一个斡角仔，感覺足成是阮厝附近，就招兩个朋友參我去揣。
踅一睏仔，啊！我又閣變成一隻［糜鹿］矣！
朋友停落來路邊共人買花栽仔，我問種花的人：請問柳鳳村按怎行？
伊手一指講：彼个青紅燈過去就是矣！
其實我足驚問著熟悉我的人，尤其頂年仔轉去參加國校仔同窗會了後，我認人的能力足差，卻有可能會hông認出來。

我是猶毋捌hông認出來啦！
毋拘阮大姐拄過。
彼是有一改伊參朋友對台北到中南部遊覽。去到公路公園，伊想講，這應該離阮出世的所在無偌遠，想欲轉去看一下仔叔伯阿嫂怹。
大姐參朋友行佇田洋，掠無厝裡的方向。
看著一个做田人，就倚問：阿伯，請問柳樹湳按怎行？
彼个人越頭一看講：啊妳都阿容！
啊！是哥哥。
原來大姐問著阮叔伯阿兄。

大姐佮怹朋友笑甲歪腰。
伊共這層代誌講予阮聽，雖然我家己嘛是［糜鹿］一隻，阮ah是共伊笑足久的。