2019.02.18

這幾日若出門，看著遠遠的山是殕色的，鼻仔就毋做工、暝時就歹睏眠。

幾月日前醫生開一罐噴劑佮藥丸。欲睏食一粒、鼻仔袂通的時一日會使噴兩回。

想欲做一个聽話的患者，遵照醫囑行落去！
毋拘，藥丸仔食落下到地，全身無力，症狀原在，毋敢閣食。
這幾日噴劑噴袂出來，殕色的天又閣予我睏袂好勢。
　
早起去揣醫生。
機車停好，病院走廊的輪椅無偆甲半隻。拜一，病院參銀行仝款，人真濟！只好勻勻仔行。抺石仔的塗跤，行著真驚會滑倒，毋敢大伐[tuā-hua̍h 大步]行。

佳哉行入門，服務台一位頭毛白白的志工看著我，足熱心捒一台輪椅倚來我後面講：妳坐落來！
我斡身欲用我的方式坐落來的，伊就閣共輪椅捒去我後面：妳坐落來啊！
就按呢、我一直咧揣我適當的方式，伊一直共輪椅捒去伊認為上四予的所在。
後來伊總算知影，伊四序、毋是我的好勢！
　
坐落來！遮簡單的動作，哪袂曉？
　
無毋著。鐵鞋佇跤頭u正爿佮倒爿有裝鎖，我若欲坐落來，著先共一跤兩个鎖giú開，坐落來，才閣開另外一跤的鎖，按呢才袂一雙跤直直直像khōng石膏按呢，會kâng挨著。
　
因為遲到過號矣，等真久。候診室人坐甲滿滿滿。原來有遮濟人參我仝款，敢會使講：我並無孤單？！

醫生問：tann感覺按怎？
我：空氣若濁濁［lô-lô］，就袂通。噴劑噴噴咧，就好矣！這幾日藥仔噴袂出來。
我共藥罐仔提予看。
伊講：噴袂出來就是無矣啦！

醫生問：藥丸仔咧？
我：毋敢閣食。食食咧除了愛睏佮無力，症狀原在。
伊講按呢莫食，閣開噴劑予我就好。
足感動！共醫生講食藥仔會愛睏，伊是我拄過頭一个同意的醫生。
以早共醫生講食西藥會愛睏，捌去hông罵呢。

醫生行倚來，提儀器看我的鼻仔。
我講：有較好矣！
伊講：這袂斷根，妳著佮伊和平共處。

我知！咱都毋是拄出世的幼囡仔，哪通要求零件完整如新咧？會當好落眠，就已經感覺誠幸福矣，閣無講，當咧開的柳丁花芳，一半改仔我閣鼻會著呢！按呢的日子罔過，雖然殕殕的天，嘛是感謝伊