2019.02.14

10工年假(家己+1)，無閒私事，到這馬才無閒煞。
　
共同事講：若是照阮阿爸的工作模式，無閒一个坎站了，著去看一齣電影來放鬆心情。
電影莫看、共時間提來回想一下仔這个年假的感動。
　
過年進前，囡仔就咧問，敢有啥活動？
無呢！
　
以早怹阿公佮阿媽猶佇咧的時，會出去蹛民宿過新年，雖然序大人離開已經七、八年矣，年一下到，猶是會有想欲家族聚會的情緒。
　　
年假毋知第幾日，看囡仔咧耍電動，想著阿維今年換頭路，佇屏東過年無歇睏。
毋通為著我家己的私事，煞來錯過親情的交流。
　
問囡仔：「咱來去屏東揣阿舅好否？」
應該：「好啊！」
我：按呢咱lâi-i坐火車。
囡仔：是按怎欲坐車？
我：爸爸無愛駛長途的。
囡仔：我駛啊！
　
啊～著齁！囡仔已經大漢矣，我哪閣停佇以早伊細漢的時？
原來不知不覺當中，向望的［囡仔緊大漢］，已經大漢矣！
　
決定拜五欲去屏東。
阿維問幾个？我講囡仔開車載阮2个。
　
後來臭生老大講怹嘛會去屏東揣阿維，規氣撨仝日去。
　
拜4四暗，門口傳來二姐的聲：哈囉～新年好！
二姐講初二佇Ｌine看著我佮大姐，一南一北一个泡茶、一个啉咖啡，若像看著兩个頭擔擔咧望外家，車開咧，就去揣大姐。
阮頭犁犁啉咖啡咧看冊、哪有頭擔擔？- - -其實真感動二姐的疼惜。
　
二姐載大姐，沿浪漫台3線一路耍來到遮。
共怹講第2工欲去揣阿維。
　
人數一台車拄好，按呢欲開幾台車？
二姐講去屏東了後伊欲載姐姐繼續浪漫，所以駛兩台，毋拘路裡伊需要有人替伊看網路地圖，按呢就予我這个路痴來替伊看路。
囡仔載怹爸爸先出發，阮三姐妹仔一台車，3个查仔人佇車底，拄好像一个菜市仔遐鬧熱。
　
阮拄出發無偌久，臭生就khà來講怹到位矣，怹兜的人開車攏誠緊，是毋是開siuⁿ慢會hông除籍？哈！
無偌久囡仔嘛到屏東矣；阮猶佇半路翕相、揣便所！
　　
聽囡仔的話，對九如391交流道落去。
誰知影落去了後，地圖講話矣：請去頭前迴轉、上交流道。
咦？
想欲聽囡仔的話，毋拘東西南北毋知欲行去佗？
只好聽地圖的話，再次上交流道；拄斡起哩，囡仔來電話講：391落來直行就到矣！
袂赴矣！
　
408交流道落來，靠腰！that車that甲若像停車場，時間已經過晝真久矣，閣接著電話問看阮行到佗？