彼个活潑的a-khîm，無論運動會抑是會員大會，總是無時閒，坐一台輪椅會場踅啊踅。hit-tah講一下，chit-tah lā一下，是一隻愛飛的蝶仔。
　
上尾一遍看著伊，是佇運動會中晝歇睏時間，逐个咧食飯，伊踅倚來問我：啊妳當時欲退休？
應伊講：無規畫呢，因為無常佮退休，毋知啥先到！
彼是熱天時仔的對話。
彼年寒年，就聽講伊佇夢中安靜別世。
唉！

a-mî是我來雲林，第一批熟似的殘障朋友之一。伊真gâu煮食，炊粿、縛粽、包水餃，逐項都會。我佇伊遐學會曉包水餃，我佇怹兜頭一遍看著［蘋婆］這个物件。我頭一遍看著殘障查某人會曉家己換機車的火珠仔……

伊已經佇頂年仔轉去天家，毋知按怎，開會的時攏會想欲佇某一个角落仔，揣伊參朋友開講的身影！

歲月行過無聲，緣份只是相閃身，咱嘛攏毋知影……