彼个年代（其實嘛才十幾年前），台語字典真缺，網路字典閣較免講（嘛有可能咱袂曉揣），有時陣為著想一个用字，會共思維chām-tn̄g（中斷）。
初初咧寫，寫了會用電子批寄予居士修改用字。
居士真用心指導我。
　
有時陣參加活動，人若問我教我寫台語的老師是誰？我會講是許居士！
　
毋知佇啥乜台語活動，我無去。有人共居士講：你的學生翠苓…
居士應人講，伊毋是我的學生！
　
了後，毋但一个人來問我
居士汰無愛承認妳是伊的學生？
　
居士是我敬重的人，我知影伊按呢回答人，只是謙虛！

佇心肝頭下一个願望
有一日，我若提著母語諾貝爾獎，我一定欲大聲講：我的台語寫作啟蒙老師是許居士！
彼時，伊一定笑甲喙仔開開開！
　
當然，這是乞食下大願，總是，有夢上媠！
　
歡喜讀冊會十幾年來，猶原佇咧！阮會珍惜。