雄雄聽著外口人咧問：有人佇咧否？
想講選舉期間，定定有人來問安，票極加嘛才1張，閣較拜託嘛袂加出來，無想欲應。
煞聽著有人咧喊我的名。閣講：啊～車無佇咧，毋拘門無關。
聽起來，毋是選舉，是熟似的人。
緊起來看覓咧，若無怹越頭走，我就毋知欲佗jiok（追）
　
哈～原來是二姐載大姐佮小妹仔來揣我。
哪無愛先講啦！
應講我假日攏真無閒，經過越入來看一下，若無佇咧，阮都來過。
　
我哪有偌無閒，只是有出去參加活動會ＰＯ出來，閒閒佇厝裡，無ＰＯ的時陣較濟矣。
　
怹叫我鐵鞋穿穿咧，隨出發，欲去屏東。

厝無人佇咧，水槽仔碗猶未洗，敢好？

當然嘛是好，無～敢欲閣佇厝裡欣羨怹咧耍的身影？
用真緊的速度款款咧，綴怹走！
綴有著陣的感覺，誠好！
　
到屏東綠農的家已經暗矣。
佇綠農店前坐咧開講，坐有一睏仔才發覺，咦！這是室外，哪會攏無蠓？
　
原來怹岑簷前有一道水，內底種水草仔，飼魚仔。洪老闆講，魚仔會共蠓仔的幼蟲食掉，魚仔攏免另外下飼料就會活，毋但無蠓，這道水，閣會使共室外的燒氣隔寡仔佇室外，內底冷氣就免tsūn siuⁿ強（開太強）。
大自然，咱若用寡仔心思佮伊鬥陣，往往會得著想袂到的善意回報。
　
阿維訂2間房間予阮4个人過暝。住房真四是，只是差無障礙較無齊全，這是普遍現象，佳哉阮抑毋是寸步難行。
　
雖然訂2房，四姐妹仔勼做伙，講甲逐个目睭攏強欲peh（睜）袂開才甘願去睏。
啥乜所在上好耍？有親人陪伴的所在，就算是干但khut佇飯店，嘛是誠好耍的所在
　
去一畷屏東，才知屏東無想的遐遠。
原來，屏東參高雄有寡仔範圍是徛做伙，平懸的，毋是我想的，高雄行了才會到屏東。
地理，就是按呢認捌印象才會深啊！
　
又閣想起國中地理課，考試紙內底問中國鐵路的線路，全班無幾个級格，教地理彼个老師氣甲共考試紙phiaⁿ落去糞埽桶，氣phùn-phùn走出去教室！
　
老師當時若tshuā阮去中國坐一遍火車，阮一定考一張誠好的成績單予伊看！