 
字體：小 中 大 |
|
|
|
| 2020/04/30 10:44:15瀏覽48｜回應1｜推薦1 | |
2018.10.03 頂站仔掠彼隻皮膚病的貓去予醫生看了，為著飼藥仔佮糊藥仔方便，共關佇厝裡成十日。較好了後放伊去，無幾日又閣一身破皮流血珠仔，醫生講：飼流浪貓，毋通開傷濟！
除非有能力，若無，只好放伊去！ 仝彼个時陣，彼隻較細隻的花貓，攏毋食，逐遍飼料倒佇碗裡，干但鼻，舉頭看咱，細聲吼。 身軀一日一日瘦，瘦甲尾矣偆皮包骨，看著會驚。 想欲掠去看醫生，閣想著醫生講：流浪貓莫開傷濟錢！ 貓仔狗仔無健保，見若看一遍醫生，會開袂少錢。 延一站仔， 內心咧交戰，欲開錢？抑是當做無看見？ 暝時咧睏，目睭前攏是伊求救的眼神。足不忍心，我若無出手救伊，這隻貓若死佇我面前，我一定無法度原諒家己的［凍霜］。 tshap 伊著偌濟錢，殘殘共開落去。 檢查出來的結果，講這隻貓有嚴重的貧血，佮一寡仔慢性病。體重偆1.8公斤。 醫生講伊會盡力共救，毋拘著蹛院，敢欲？ 好！ 第2日去看貓，醫生講，真乖的貓呢！ 我講這隻真恰，其他的貓仔攏會讓伊，這陣是無力反抗！ 第3日去看，醫生講，hóo，共我歹呢！ 好代誌，有力通共人歹。也就是藥劑有行氣。 放假病院無咧收留動物，著掠轉來。 醫生講：蹛4日，我收3日的蹛院費就好！ 含檢查費用、藥仔費佮照顧費用，有影袂少。 會當閣看著伊歹chhèng-chhèng（兇巴巴），足安心的。 掠轉來，厝邊咧問，按呢開偌濟？ 我無愛講，應講：啊都無健保，開- -寡，平安就好！ 閣佇厝裡飼幾何日，藥仔飼了，放伊去！ 就按呢，會共同伴搶食矣！ 肉嘛生出來袂少矣！ 佳哉有決定tshuā伊去蹛院！ 多謝伊閣倒轉來，予我無遺憾。 醫生叮嚀：流浪貓的生命攏真短，妳著有心理準備！ 好、我會！
|
|
| ( 心情隨筆｜心靈 ) |
