佳哉漸漸仔回魂，感覺閣倒轉來，去古坑到斗六閣轉去斗南，攏順順順，無擋著人的路。
同伴呵咾講我進步誠緊。
其實毋是，是拄開始退步誠濟！

中途入去看石龜溪微笑六房媽。
聽講這仙神像，原本咧拜的主人共伊提去六房媽遐寄囥足濟年，攏無來提倒轉去；後來佇內底做義工的人（也就是現此時咧服侍的人），感覺參這仙神像誠有緣，就請示看會當請轉來？竟然允准。

因為成十年無人整理，神像的衫誠舊，當咧共換新衫的時，看著神像的喙角微微仔笑，怹就共伊號做微笑六房媽。
詳細共看翕轉來的相片，真的哦，媽祖咧笑呢。

手搖車開始時行頭幾年仔，看學弟阿瑟咧耍，騎去小路仔翕相，阮看著誠欣羨，彼陣足希望家己嘛有才調按呢耍。
　
下晡佇古坑歇睏時間，入去小路仔翕誠媠的景色，提予tshuā阮出來耍的阿瑟看，講：心想事成的感覺，誠好！