這時陣已經倚1點！
　
轉來厝，想講囡仔下埔的確有班，莫吵伊。就揣出來伊頂改轉來提予我彼張名片，敲電話去台北手機仔店。
店員講：手機仔欲賣出去的時，攏有試過，連接ＷiＦi應該袂有問題，建議我是毋是去揣第二間處理看咧？若真正有問題，才送修！
　
台ｘ大鎮北店是附近上大間的，敢有閣比怹較gâu的？
想著欲寄手機仔去台北誠費氣，不如先聽伊的建議。
下埔去民生南路台Ｘ大的店。
欲去的路裡想講，唉！欲送我物件，都打現金就好矣！
若予我順利處理完滿，一定欲去義美買冰來食！
　
工作人員看我的手機仔講：「遮新，無啥可能有問題。我看一下！」
看伊舊的點開、新的點開…無hâu-siâu（華語講『不誇張』）都無五分鐘，伊講：無問題啊！
　
想袂夠一張細細間，才兩个員工的店，就共我煩惱甲中晝食袂落飯的問題解決矣！
行出來手機仔店，斡去附近義美買冰。順紲買兩份請手機仔店的，『帥哥佮正妹』。

這種冰我真愛食，心情好的時，會想欲食一塊；心情䆀的時，嘛想欲食一塊矣！