2018.08.30

這台超過10萬kiro（公里）的戰車，烏油的紅燈已經to̍h足久矣。
最近逐工下班時間攏落雨，無方便去換烏油。愈騎愈袂放心，無去機車行走一畷，驚仔會顧路。
　
車騎入去機車行，無看著平時仔咧做工課的師傅，干但頭家咧估一台事故車的修理費用。
等伊估好，問伊呔無看著師傅？講是去台南上課。在職進修？毋是，是上環保的課。
這間機車行足重視環保問題，一般機車行咧修理車的時，會用風共車頂頭的塗沙粉仔tsuānn掉，伊是用吸的。修理場所頂頭的燈火是光亮的，無牢ing-ia（灰塵）。
　
我騎的戰車邊仔有輔助輪，欲換機油著愛拆輪仔，較費時間，我就坐落來等。
頭家提家私頭仔拄欲拆爾，一个阿桑騎入來講嘛欲換烏油，我想講換伊的免拆輪仔會較緊，就共頭家講先換伊的，我等一下無要緊。
　
安全帽仔拔落來的阿桑，白白白的頭鬃，行倚來共我講多謝，順紲坐落去講：「唉！袂堪得徛矣！」
彼那以早，我無法度體會［袂堪得徛］這句話的感覺，今，我知矣！
我共伊講我嘛是。
　
參阿桑哪等哪開講，伊講伊同事的囡仔，嘛是像我按呢袂行，伊講：恁攏真勇敢！
　
從古早，勇敢兩字用佇我身上，我攏感覺怪怪。
我咧想，勇敢應該是按呢解講：明知影這層代誌是困難、危險的，我猶肯去做，去面對，按呢才是勇敢敢毋是？跤袂行這層一世人困難的代誌，是天公伯仔拍派的，ah無問我肯不肯，推辭攏袂掉，毋是我家已去認注的哦，所以佮勇敢無關係！
　
頭家哪換烏油哪巡阿桑彼台車，我看伊頭前輪磨甲誠平，這種澹濕濕的天氣，騎著危險。
果然頭家共伊講愛換輪矣。連過瀘的嘛愛換。阿桑講按呢伊錢毋知紮有夠否？我是咧煩惱，舞甲來我暗頓敢閣有人咧賣？
　
大通路車來來去去，塗跤雨水一滴綴一滴一直落落來。車聲人聲吵鬧中的雨景，有淡薄仔平靜的感覺，若細漢時落雨天，恬恬坐佇護龍看雨水滴佇岑簷前的情景。