2018.08.24

上下班愛行這條路，毋是干但愛伊的安靜，一tsuā（趟）路行落來，極加參兩、三台車相閃，有時陣連一台都無。新路，路面品質雖然毋是誠平坦，至少猶袂坎坎坷坷。
行佇這條路，會聽著鳥仔唱歌予咱聽，鼻著青草仔有若無的芳味。行啊行，閣會看著溪邊一排柳樹徛佇遐；這是我上愛看的景色。
　
細漢佇塗跤兜做『爬行類』，爬甲七歲阿爸第２遍教我學行。阿爸攏講我好命，別人一世人學行一遍爾，伊煞著教我兩遍學行。阿爸當然是毋甘，毋是真正呵咾我好命。
　
佇塗跤爬彼段歲月，上捷出入的，是阮兜護龍頭前彼个門口埕，爬過埕尾就是閘門跤。
閘門跤種一排足懸的刺竹做內外，透早應該是四、五點仔天未光，竹尾溜會有烏鶖來喝咻：kā-ke-kiu！阮伊呀會佇這時陣起床攢早頓。
爬出去閘門跤，是一條細細條仔的水溝仔，捌看內底人厝裡若有囡仔著青泄青屎，會來水溝仔邊收驚。跳過溝仔，邊仔種一排燈籃仔花，阮會佇花欉下面辦公伙仔。
燈籃仔花外閣出去，是一坵田，過這坵田，是一條較大條的清水溝，清水溝邊有一排柳樹。
　
彼排柳樹跤，是我佇塗跤爬的歲月，上想欲去的所在。毋拘一直到離開故鄉，我攏毋捌去到遐。
　
阿爸若去賣菜，阮會佇閘門跤等，看對清水溝東爿彼條路的許厝崎仔，阿爸鐵馬仔若落崎，看伊大菜籠菜賣了矣，籠仔底硩一包糋粿抑是豆pio（就是這馬有人咧賣『小時候』的餅），彼是阮的等路；當然，阿爸的菜籠若是有偆彼賣無出去的菜，就免數想有等路通食，免問、嘛毋敢問，今仔日菜無好價？因為在阮的記持當中，阮細漢時陣的阿爸，定定戴一个「樸克臉」，伊無講話的時，面足嚴肅，莫講連厝邊的囡仔驚伊，阮家己的阿爸，阮嘛毋敢參伊加講話。
　
我是一直到出社會食頭路，厝裡該嫁的姊妹仔嫁了矣，哥哥去台中做頭路，小弟仔咧做兵，厝裡干但我佮阿爸阿母，暗時看阿爸家己坐佇冊桌仔遐，恬恬看冊看報紙，我有時陣參伊講幾句仔話，才發覺，彼个「樸克臉」之下的阿爸，其實是慈父的面啊！
　
細漢時毋但咧等阿爸賣菜轉來，會參柳樹相相。尾暗仔等伊呀對田裡轉來，嘛會佇閘門跤，看向柳樹岸，會用得講是：逐工看袂煞！
彼排柳樹，樹枝津落去溝仔底，有風的時搖著誠好看。
離開故鄉幾何十年，這馬轉去，彼條清水溝佮彼排柳樹，已經予紅毛塗占領。但是柳樹佇我內心，若像有的囡仔欲睏的時，搝著彼領又閣舊又閣破的被仔角，毋願放！
　
送阿娘上山頭轉來彼陣仔，我定定去小路仔彼欉柳樹跤坐，誠袂了解，阿娘遮呢疼我，哪會甘得走？家己愈來愈老，愈來愈了解，阿娘呔會甘得走！
　
捌載囡仔經過一欉柳樹邊，共囡仔講：媽媽上愛看柳樹。
囡仔應講：彼樹跤較垃圾！
我講袂啦，清氣甲你無看？
伊講是較陰。
我講你少年人咧信這？
是毋是鬼仔故事看傷濟？
　
今仔日歇風雨假，我想，無論雨若大，柳樹一定會平安徛佇遐！因為故鄉彼排柳樹，曾我出世就徛佇遐，經過風風雨雨，毋捌看怹消失去。
曾到今，我看著柳樹消失去的原因，攏是人為的！
　
一寡仔有頭有面的人，足愛佇鏡頭頭前種樹仔予人翕相。啊足奇怪，剉樹仔的時，攏會閃過鏡頭！