紀淑玲老師來雲林幾何tsuā矣，每一遍攏綴無著陣。
這遍毋甘閣錯過。
下埔享受一場精彩的說唱，紀老師現場唱伊作詞作曲的歌，說明歌曲背景的故事。
有時唱歌，有時演奏樂器，紀老師講故事，有一个迷人的魔力，不知不覺綴伊行入去伊彼遍清幽的鵝尾山。
　
紀老師是淡水人，當伊共淡水白宮的相片show佇螢幕的時，我掠準已經掩崁甲誠四序，袂閣趖出來的鄉愁，這時陣佇心肝頭湠開。
　
畢業了佇淡水食頭路，中晝頓是阮阿母逐工透早，現煮的菜佮飯，替我攢便當。咱毋知通好命，有時陣會共伊講，今仔日無愛紮，欲去食阿給。佇彼時陣，食阿給是予阮當做食『大餐』。
　
著！白宮彼个所在，就是我若參同事去食阿給了後，會去遐行行咧。到今，經過幾何十年矣，我閣會記得附近安靜的小路，無啥人踏跤到，樹葉仔落甲規塗跤，日頭曝甲焦焦焦，踏落下到地誠好聽，阮誠愛去遐行踏。一直到讀著席幕容彼首詩 - -一棵開花的樹：『如何讓你遇見我，在我最美麗的時刻，為這，我已在佛前，求了五百年，求他讓我們結一段塵緣』
我跤踏過的樹葉，嘛有可能是等我幾何世人的一个緣啊，敢毋是？予穿鐵鞋的跤步踏過，一定閣較疼。何等殘忍！ 
　
故事聽了，行出來故事館。看著砛簷跤khuè一塊白鐵仔做的［渡橋］，是欲予坐輪椅的人順利入去聽故事。有夠搭心的安排，舊建築欲做無障礙有較困難，用一塊渡橋，解決阮的無方便。這就是叫做［有愛無礙］。
可惜，我蹛較遠，若無，就會當駛阮的快樂馬車，定定來！