共買一tēnn轉來煮！

誠久毋捌煮，煞袂記得愛用啥落下芡芳，想一時仔，才想著。這項菜，應該有淡薄仔蒜頭的芳，佮略略仔hiam（辣)。

欲提囥佇灶頭邊仔的蒜頭，看著一搣剝散去的。
彼是早起，來摒掃的小姐，拄咧掃走廊，巷仔口一个阿桑經過，入來走廊參摒掃的小姐講話，看著我用網仔吊佇壁頂彼包蒜頭，講彼愛剝開才袂爛去。
我佇內底聽伊按呢講，無應伊。
想講蒜頭大出的時買轉來，已經曝甲誠焦，袂爛去！
摒掃的小姐已經入來矣，阿桑家己佇走廊一直唸彼包蒜頭，尾仔聽伊咧剝蒜頭的聲，出去看，伊講這愛剝開啦，袂使無剝就囥咧。
　
哪有人按呢？我都無愛剝啦！
我總是感覺空氣無好，剝開的蒜頭會坱埃著，平時仔我會提幾粒仔入來囥灶頭，欲煮的時才剝開。
　
雖然內心無歡喜，毋拘，我知影袂使講毋著話，若無，規條巷仔攏會知影我對老歲仔人無禮貌。我就共伊講，我才家己剝就好，多謝你！
　
盈暗拍蒜頭欲芡芳，想著這層代誌，猶有淡薄仔無歡喜。拍蒜頭的力下誠重，若像欲共受氣用刀拍出去。
　
啊～煞對家己的尾指節仔hám落去，佳哉指頭仔無像蒜頭按呢碎碎去。
疼一下，我若像聽著阮阿娘講：kham該的！
以早我若是做毋著代誌，自作自受的時，阿娘攏會按呢講：kham該的！（活該）
　
是齁！
疼一下！提醒我，阿桑共我剝蒜頭，準做我無合意，人嘛是好意的，我是咧受氣啥？

盈暗炒的彼盤蘆筍，誠好食！食甲空空空。