2017.07.11

昨暝暗頭仔阿勳出去，晏晏才會轉來，想講等伊轉來才關鐵門。
鐵門無關，彼幾隻貓仔就入來走廊遮趖、遐看，尾矣，穿白襪仔的跔起哩機車頂頭睏、麒麟尾的占領彼台快樂的馬車，烏貓徛佇邊仔看，干但彼隻貓仔母，無時閒，khàng起來蠓仔門，向內底喵喵叫，我聽無伊是咧講啥。
　
開門出去看，碗底飼料未食完，是咧叫按怎？
彼兩隻柑仔色的貓，跳落來倚佇跤邊nuà，穿白襪仔的倒落去péng腹肚予咱看，彼隻麒麟尾的毋認輸，若像咧佮伊相拚，嘛倒落去塗跤哪péng哪sai-nai，呼嚕呼嚕叫袂煞。
怹毋是枵，只是想欲有人陪伴！
　
雖然貓仔péng肚真好看，毋拘外口的蠓仔叮著予咱叫毋敢。
開蠓仔門欲入來，一隻誠大隻的蛾仔【ia̍h-á】搶佇我進前飛入來，停佇電腦主機，斟酌看，是一隻阮細漢時叫伊［鼻蛾］的蛾仔。
看著這種蛾仔，想著細漢時陣的傳說，我會驚，聽講伊會鑽入去人的鼻仔，予伊袂喘氣，所以叫鼻蛾，想欲用報紙共拍，驚伊的腸仔肚bak著電腦，閣驚伊會飛向我。用掃帚共趕，趕袂出去，參伊鬥一睏，伊煞覕落去壁跤無khoàiⁿ矣（無看見），只好放伊去，毋拘不管時都驚伊飛出來共我驚。
　
等啊等，總算聽著阿勳轉來的車聲....
伊一入門，共伊講厝內飛入來一隻誠大隻的垃圾蛾仔，我就緊覕入去房間蠓罩底，覕彼隻鼻蛾，覕甲睏去！
　
透早5點外仔，毋知佗一隻無乖的貓咧挵鐵門，鐵門都毋是透明的，若欲看會著是佗一隻，就欲罰伊莫予食。
　
驚去吵著昨暝晏睏的阿勳，緊去開門飼貓。
鐵門下跤歇一隻佮昨暝飛入來仝款的蛾仔，我叫是死去的，攑掃帚欲掃掉，伊煞飛出去，伊一飛振動，去予厝頂的厝鳥仔看著，兩隻鳥仔相爭飛落來搶彼隻蛾仔。貓仔母看著鳥仔飛落來，傱出去欲tso̍k鳥仔.....
戇貓！芳芳芳的飼料共妳攢便便，妳煞欲去jiok（追）彼隻鳥仔，佳哉貓咪技術無好，若無，一透早就看著消失的兩條性命。
　
早起彼隻蝶仔，敢會是昨暝彼隻？想做是，較袂佇厝內干但驚。