2018.06.19

我想，已經消失已經十捅工妳，可能袂閣出現佇我面頭前矣！
　
一直咧臆妳無轉來的原因
予人掠去飼？拄著歹代誌？抑是為著彼隻3花貓仔母舉醋桶？
當然，永遠無可能有答案的。
　
妳一向對這隻三花仔的貓仔母誠chheh，逐遍若共妳抱咧，看著門口的三花，妳總是無蓋歡喜，跳落去的時，差不多每一遍，攏會去共伊巴一下。
我攏會共妳喝，伊遐細漢，妳毋好欺負伊，妳總是無咧hiuh我；嘛無要緊啊，我ah無因為按呢，就無愛共妳抱嘛！
　
彼日，6月初9，對動物病院共閹了住院2日的3花領轉來，醫生交待講，著共關幾工矣，方便飼藥仔佮照顧傷痕。
自從共這隻3花關佇籠仔，囥佇厝裡了後，妳就毋捌閣來挵門吵欲入來。
彼幾工，我咧無閒顧3花，嘛無要意妳有來無來。
放3花自由了後，3花煞逐工守佇走廊毋肯走。
我想，妳應該是有轉來，是毋是逐遍攏看著3花，所以妳無愛閣來揣我抱妳？
　
自阮失去彼隻心愛柑仔色的貓了後，妳就來門口食飼料，安慰著阮失去彼隻貓的歹心情。後來一隻烏貓綴妳來，阮嘛共飼，閣後來，加2隻柑仔色，妳一直攏誠分張，飼料肯公家逐隻食，袂ânn牢牢，妳是一隻大方的貓咪呢。
其他彼3隻攏是公的，無偌久，妳就有身。閣無偌久，妳就生貓仔囝。閣無偌久妳tshuā已經會曉走跳的3隻貓仔囝，來門口耍。有一日雄雄三隻貓仔囝攏無去….
　
彼時妳閣咧予囝食奶，囝無去，妳脹奶的艱苦合揣無囝的稀微，暝日吼，總會佇我下班轉來到厝的時，來我輪椅的跤踏仔歇咧，揣安慰，暫時袂哼哼叫，我總是儘量揣時間陪伴妳，望會當減輕妳的痛苦。
　
看妳生一遍囝就受苦遮濟，身邊又閣攏是貓仔公，為著莫予妳重複受罪，嘛莫予巷仔無人飼的貓一直增加。（並毋是逐个人攏會愛貓呢）因為按呢阮決定共妳掠去閹掉，予妳無機會閣做媽媽，可能阮無經過妳的同意決定了有較自私，予妳失去做媽媽的機會．毋拘，按呢做，嘛有毋甘妳食苦的成份佇內底。
　
本來想講，我害妳去疼一刀，妳會無愛來矣，想袂到顛倒妳閣較捷入來厝裡，予阮惜，予阮抱！
妳真乖，有時仔拜3暗我上課，學白話字的視訊課程，妳一入來就跳起來予我抱咧聽課，攏袂吵，因為無開鏡頭，同學佮老師攏毋知影，妳嘛是學員之一呢！
　
寒人，冷吱吱的三更半暝，聽妳佇門口咧叫，我衫幔咧就起來提飼料予妳食，佮妳做伴一下
毋甘妳佇外口受寒熱，妳閣毋肯hông關佇厝裡做『家貓』，甘願自由流浪！