2018.06.12

昨暝共伊頷頸仔的護套一下敨掉，就無閒咧整理伊的身軀。
遐tsn̄g遮tsn̄g，愛清氣的貓，幾何工袂當tsn̄g身軀，應該是誠礙虐。
身軀整理好，水啉了，飼料食飽，叫閣較大聲，mài吵，明仔載就予汝自由！
　　
早起罐頭攪藥仔予伊食，聽著外口的貓咧討食的聲，無khuà食，叫足大聲。
想講這是上落尾一包藥仔矣，就共貓仔碗提出來，放伊出去。
　
原來伊甘願參其他的貓仔搶食，嘛無愛家已享受。
食甲歡喜甲『呼嚕～呼嚕～』嚕袂煞！閣來我跤邊一直lù，比手術進前較毋驚人矣。
　
傷痕應該是袂疼矣，看伊走若飛，跳對巷仔口直去。祝福妳！
　
離開都無半點鐘咧，閣走倒轉來挵門，欲入來。
　
哈！門裡門外，像婚姻？
　
趕欲上班，袂當放妳入來！歹勢齁！
　 
愈看愈古錐，毋拘，mài閣來餳我嘿，足想欲共妳掠入來惜惜呢！