細漢時偷食無著的彼塊鹹菜kah，走來夢中滿足我。
　
會記得是猶未七歲（毋是記持好，是因為彼陣猶怙爬的，七歲以後才徛起來學行），毋知啥乜節日，叔伯阿嫂、阿姆怹，真濟人來佇阮兜食飯廳鬥做粿。
　
我鼻著灶跤有我愛食的鹹菜，彼是伊呀禁止我食的物件。
因為醫跤，食漢藥、食補藥，有足濟物件袂使食，伊呀講彼會佮藥仔chhiat著。

人就是遮奇怪，愈叫我袂使食，我愈想欲食。所以佇大人無閒的時陣，我偷偷仔爬去灶跤，誠無容易huānn灶台舞一睏仔，才徛起來偷提一塊鹹菜甲（像今仔日夢裡彼塊遐大塊），拄欲食落爾，一隻老鼠仔sô對我的跤來。
哇～慘叫一聲，咧做粿的人齊走入來看…
毋是舉頭三尺有神明..是壁角的老鼠咧監視！
　　
彼當時我袂當食的物件，真正是『罄竹難書』講袂了。
會記得其中一項是包心白仔。
有一擺暗頓，桌頂的菜是包心白仔，伊呀交待貯飯予我的大姐，毋通夾彼項予我。
我對大姐的手接過一碗飯，pe無幾喙，去食著包心白仔，有夠歡喜，就大大聲講：啊！我遮有包心白仔！
　
阿姐講伊毋甘我無食著愛食的菜，才會偷偷仔共菜藏佇飯內底予我食，哪知我遐白目，好食恬恬仔食就好，閣喝出來，害阿姐去予伊呀罵。
　
嗯！來去睏，盈暗看會夢見伊呀煮的彼kiang包心白仔否！（一般人咧講的碗公，阮講kiang）

細漢時被禁止的食物，家己會曉煮食了後...不時都煮，像欲補tīnn以早無食著的彼个物