伊真愛共彼隻烏貓綴前綴後。
我共飼料碗囥入去籠仔內底，伊枵，嘛毋敢入去。
後來烏貓入去食，伊就放心仔綴入去。
兩隻攏關起來，食了，烏貓做前欲出來，我就共放出來，緊關起來，就按呢，予我掠著矣！
啊！毋知會害伊無相信愛情否！
　
敲電話去動物病院問看有人會當共手術否，有的講醫生無佇咧，有的怹下班矣….
唉！貓佇籠仔底哭甲足大聲，想講閣敲幾通矣，若閣揣無醫生就欲放伊自由。
佳哉！有矣。
　
載伊出門，一路反抗。佳哉伊細隻，袂衝出來。
　
醫生看看咧講，手術了，汝著共顧幾工矣才通放伊出去哦！
貓仔𠢕跳懸跳低，驚空喙會pit-sûn，著閣重紩較費氣。
　
毋拘，伊是流浪貓，毋肯蹛厝內啦！
若無，予伊佇遮蹛幾工矣，是講，汝著加開錢啦！
　
無要緊，阮老大臭生有講，凡若錢會當解決的代誌，攏毋是大代誌。

加開寡仔錢，較免煩惱愛耍的貓，會耍甲流血流滴。

這隻閹了，這條巷仔應該就無理由閣增加流浪貓的數量嘍！
　
是講，嘛歹講，聽講有人會共貓掠來遮擲掉。

唉！貓咪遮呢温純的小動物，是按怎有人會無愛咧？

其實共閹掉，是違反自然的代誌；毋拘，若無按呢，毋知會生湠偌濟無辜受苦的小生命。
　
.......為汝好啦！歹勢哦。