2018.05.17

昨暗欲睏進前，聽著外口有貓仔咧哼的聲，想講是咧飼彼幾隻貓仔討欲食，怹誠好款，逐三頓食，有時陣閣欲討宵夜，厝邊阿桑有時陣會講，貓仔一日飼一頓就好，莫予食遐濟頓。

咱都擋袂牢怹sai-nai（撒嬌）的聲，若來門口喵，倒寡仔飼料予怹，怹就歡喜食甲呼嚕呼嚕，嚕袂煞，遮呢簡單的幸福，咱thài-thó有（豈有）無滿足怹的理由咧！

聽一下久，毋著咧，若像毋是大隻貓咧哼。開門一看，一隻像老鼠仔遐細隻的貓仔囝，跔佇飼料碗邊仔，跤猶袂曉徛，徙位是用sô的，應該是貓仔母咬來遮囥的，看起來腹肚誠枵，提飼料予伊，袂曉食，是猶咧食奶的貓仔囝。
　
驚伊會枵死，共掠入來，厝裡無牛奶粉，泡一屑仔阮早起時咧食的五穀粉，無『餵食器』嘛無射筒，我提吸管一點仔一點仔共飼，頭起先食足緊的，足枵的款，毋拘可能是無合味，食無幾喙，就無愛食矣。
　
想欲共伊囥厝內底予過暝，閣想講，貓仔母有可能會來共飼奶，伊的媽媽，就是無偌久才加入門口貓仔隊伍彼隻細細隻仔，看起來若像貓仔囝，卻已經做阿娘矣，真正是貓嘛不可貌相。

我用一kha　Ｄouble－Ａ影印紙的紙箱仔囥門口予伊跔。
　
舞甲來規身軀汗，閣重洗一遍身軀，倒落去睏已經翻點矣。倒佇眠床睏袂去，規个耳空內攏是貓仔囝咧哼的聲，用耳機聽音樂，嘛無法度共貓仔聲去除；一半有影伊咧哼，一半是我掛心幻聽的聲音，實在足不忍心，一个遮呢脆弱的生命，得袂著老母的照顧，我閣無能為力。

毋知經過偌久，有聽著貓母倚來門口的聲音，這時陣我才放心入眠，想講，上無，貓仔囝會吸幾喙仔母奶吧！
　
早起五點捅仔，阿勳開門看貓仔囝，貓仔囝猶是叫袂煞，佗來的力啊？叫一暝攏袂梢聲.。巷仔內底巡一遍，無看著貓仔母，我共飼料泡予軟，想欲共飼看咧，伊袂曉食。這時陣看著貓仔母佇巷仔口遐，尻川翹懸懸，咧參伊的男朋友談情說愛，我看得有淡薄仔受氣，遮呢無負責任的媽媽。
　
阿勳講是我用手共掠，貓仔母才會無愛認這咧囝，伊講我應該掛手套才共掠；唉！我無想著這點，貓母已經放捨貓仔囝，今，是欲怎樣？
　
較晏我參阿勳攏著出門，貓仔若一直佇門口，一定會熱死。
　
敲電話去消防局指揮中心問，欲按怎處理這隻貓仔囝？
消防局無咧處理這，予我一个號碼1999

透早五點外敢有人會接電話？
以早的經驗，有問題欲問公部門，電話若毋是無人接，就是轉來轉去，轉甲尾仔會揣著一个姓吳的姐姐，華語叫『吳姐』(無解)。
存著懷疑的心情1999揤出去，閣真正有人接呢，有人佇咱毋知影的時陣，守著職務恬恬咧做代誌﹐啊！這个國家有希望，我內心有感動。

1999予我一个電話號碼，叫我八點上班了後，才敲去動植物防疫所，怹會共我講這隻貓會使送去佗一間怹有咧配合收留動物的動物病院。
電話敲了，吊懸懸的一粒心，總算較輕矣。

頂年仔領養一隻貓仔，有聽動物病院講是清潔隊送過來的。
著齁，先送來去清潔隊。
　
準若八點了後才處理這隻貓，按呢我早起著請假，先送來去清潔隊看有咧收否？怹若袂當處理，我才來請假。
　
六點捅仔，我共貓咪載出門，一路貓咪一直叫，聽著足不忍心，心略略仔疼，實在有想欲留落來，毋拘，想一下較真，雖然這時陣是一隻貓仔囝，無幾年，伊會變做老貓，當當伊身體老矣，需要送醫療的時，阮嘛老甲無力處理矣！
　
來到清潔車停車場，我糞埽攏提來遮擲的。
時間猶真早，曠闊的停車場干但看著一个穿制服的工作人員，規身重汗咧處理糞埽。
　
我共伊講這隻貓仔猶袂曉食飼料，貓仔母咬來阮兜門口就無欲共飼奶，問伊敢會使替阮送單位？
　
伊共手底的工課下落去，行過來，共貓仔看一下講：會使得！
我驚伊共貓擲去糞埽車準算，袂放心閣問一擺：真正會使得齁？毋通共囥落去糞埽車哦，恁若袂當處理，我會使閣共掠轉來去。
伊笑笑講：會啦！
我其實閣有略略仔袂放心。
　
看伊用雙手誠細膩phóng著紙箱仔，囥起哩一台發財仔車的後斗，想講，毋是凊彩囥塗跤，予我加足放心。
　
是講，都交予伊矣，咱就應該信任人！
　
貓咪啊！汝大漢了後，一定是一隻足媠柑仔色的貓，毋是阮無愛飼汝，實在是毋敢保證會當予汝一个安心的未來。
　
希望汝今仔日開始，有一个安穩的貓仔岫！
　
我驚想汝的時，內心有濟濟對汝的虧欠，所以，其至連一張相片都毋敢翕。