2018.05.07

透早參哥哥約佇新烏日火車頭，同齊坐高鐵去台北。

講嘛奇怪，斗六到新烏日的車班，竟然無甲一班快車，干但會當坐區間車，斗六到新烏日站，坐點外鐘，新烏日到板橋38分鐘就到，一時仔像龜咧趖，一時仔像箭咧飛的懸低速度，感覺誠無爽快。
　
是講，我欲講的毋是這。
對斗六到新烏日的車內底，邊仔坐一个傳教的查仔人。
提一本細細本仔的冊叫我看，我講我有家己的信仰，無想欲看。
伊煞家己冊提咧，佇我面頭前掀予我看。一直講、一直講……
　
頭一頁有一仙尪仔，就是怹所講的國父。
伊開喙合喙咱中國、咱中國。
我聽著擋袂牢，應伊講：中國離我真遠，我無想欲聽。
　
伊真毋死心，閣用另外一个方式講：好啦！莫講中國。咱炎黃子孫….
足想欲舉枴仔共趕走！
　
我提我的冊出來看，伊毋死心，閣講：三藏取經取毋著去啦，印度比咱較落伍，嘛才佇亞洲爾，真正的經毋是按呢凊彩提轉來，就共咱中國人騙遮久。
　
我閣共講：我真正有我家己的信仰，無想欲聽！
伊講：著啦！愛互相尊重….
續落…閣一直講
若信這，才有天堂通去，若無，攏是對地獄去！
　
我聽人講佛經幾何年，從來毋捌聽講經的人，批評別種宗教用這款［別項宗教攏戇人、罪人］彼種予人聽著鑿耳的言語。