小妹仔欲來炒大麵予阮食，知影我灶跤的鼎無大kha，鍋仔無夠大，就家己紮。伊講橫直怹翁開車，紮物件袂費氣。
　
小妹仔嫁了，加誠𠢕煮食，阮咧縛粽，小妹仔揀菜、洗菜、切菜，伊款炒麵的料，厚工甲袂使縛粞粽，誠有耐心，哪做哪講笑詼。伊講，遮个笑話是怹大官以早講予怹聽的。
其中一个笑話，誠有意思，佇遮記起來。學起來，無論佗一項代誌，共伊chiâu去會感受著幸福的角度。

乞食公佮乞食婆暗時揣一間土地公廟仔過暝。
睏甲半暝仔，有一對翁仔某行對廟仔過，欲去巡田水。
乞食公共乞食婆講：妳看，佳哉妳嫁我，毋免半暝仔起來巡田水。

阮聽著笑甲欲死。

笑聲當中，麵炒好矣，粞粽嘛落鼎矣。

過晝，小弟仔的同學黑皮（happy）嘛來矣，以早阮爸母猶佇咧的時，伊定來阮兜陪伴阮爸母，尤其小弟仔去做兵彼幾年，伊的陪伴，予阮爸母較袂孤單。
　
談話當中，姐姐講黑皮去阮兜，攏當做家己的厝按呢鬥做家事，伊應講：啊厝裡都偆兩个老歲仔佮一个跛跤的毋！
佇阮的感覺，伊就若［家己的人］。
　
會記得我拄來斗六，一遍厝裡的人來，黑皮嘛有來，欲起哩二樓，問看著褪鞋仔否？
我講：悾的！免啦。
伊聽了，共鞋仔褪掉才起哩。
我講：都共你講免褪，你是聽無？
伊講：你是講［悾的免］，我是巧的，當然著褪鞋仔。
　
禮拜日十點外，阿維載大姐佮二姐，去員林火車頭載阿維的查仔囝倫倫，欲鬥陣去社頭看阿公阿嬤。順勢轉去故鄉行行咧。我無綴怹去。
食晝飽，siàng落去睏，一時仔就毋知睏到第幾殿，睏足沉足沉，有時仔略仔精神，聽著阿勳咧看戴資穎拍球的聲，無想欲起來，若像欲共這幾工攏翻點才睏的眠，睏倒轉來仝款。

雄雄手機仔咧tân，是大姐的聲。
伊講：翠苓，倫倫揣無…
hăⁿ？目睭看一下眠床頭的時鼓仔，下晡3點外，怹猶佇員林火車頭，揣無阿維的查仔囝？
大姐續落講：阮佇社頭，倫倫揣無怹阿媽囥佇佗？妳敢會記得阿爸怹囥幾樓？
吼！欲共我驚死hioh？
其實大姐嘛才停無兩秒鐘，就講續落去，我卻佇短短的時間，內心演出囡仔失聯的戲齣。實在有影想siuⁿ濟。
　
台語，就是遮呢仔精彩！
是倫倫揣無，毋是揣無倫倫。
我是咧緊張啥？

愛睏神嘛予我驚一下走甲無影無跡矣！