我的跤誠細，攏買囡仔的襪仔咧穿。阿爸講我古早人，縛跤查某細跤蹄；其實我是袂大，毋是縛跤！
　
襪仔干但一種寸尺，我共伊講我無咧穿這，伊講這是誠大眾化的寸尺，予厝裡的人穿，若穿會合，另日欲閣買會使敲電話予伊，伊會送過來！
　
我講3雙100，汝按呢走汰會合？
伊講是向望穿會合，另日共怹買。
　
我咧趕時間，歹勢kăng趕走，就提100箍共買。
錢提予伊的時，我共伊講：歹勢呢，其實我原本想講汝是詐騙集團，毋拘，若是為著欲騙100箍講甲誠認真，嘛算辛苦啦！
伊煞笑出聲。
　
尾暗仔下課轉來，厝邊有人佇門口咧開講，怹講，這馬台灣的少年仔攏予中國的高薪giú過去矣，後擺台灣干但偆老人！

聽怹按呢會，我想起中晝彼个規身重汗的推銷員。雖然100箍爾，希望我共伊交關的動作，會當予伊一點點仔鼓勵，繼續留踮家己的所在拍拚，做一个知足快樂的台灣人。