2018.04.05寫

對外口轉來，聽著阿勳歕口琴的聲。無偌久欲上台表演，伊咧練習老師拄教的曲，我機車停好，口琴聲嘛停睏矣。
　
：「我佇厝，汝歹勢歕，著否？」我按呢問伊。
伊講：「噪人耳！」
袂啦！我咧練唱合聲，敢毋是嘛誠無好聽？！
無，我出來去好矣！
伊講免啦，歕口琴也毋是規日會當一直練。
口琴我嘛會曉歕，伊講的，我了解。

囡仔的工課誠無閒，休睏的日子參一般人無仝。
伊捌共我講，趁猶會曉家己捒輪椅，愛去佗𨑨迌（chhit-thô），就去！

　＊　　＊　　＊

會曉家己共輪椅拎起哩戰車，出門加足方便。
輪椅紮咧，車騎咧，毋驚體力無夠，袂當行遠路。
　
透早，飯店外口的鳥仔聲共我叫精神，對落地窗看出去，是覕佇罩霧的山區。
這間飯店誠奇怪，『無障礙』便所佇樓跤才有。
想講，去便所一下才轉閣起來提行李。
入去電梯，電梯煞予別人揤落去地下停車場，我欲去的一樓無停。
這个電梯蓋奇怪，是單行的，會當落來袂當起哩。
　
對人行出大樓，想講等一下才對一樓大廳入去。
空手戽蝦啥物都無紮，佇附近街仔路踅一睏仔，靠夭！我這个路痴，煞共飯店踅無去。較慘的是，我袂記得我蹛彼間飯店叫啥名？
路裡的人，跤步誠緊快，閘袂落來一个通好問路。
　
佇路邊略仔暗暗的所在，有人咧顧擔仔，伊咧賣風景區特有的手工藝品，看袂著伊的面，干但看著伊倒手爿的面模仔，目睭佮鼻仔的型，有夠成我高中一个同學- - -醋桶的(褚美惠)，伊後來去美國做職業軍人，這幾年退休，看伊定定佇面冊貼伊轉來台灣四界旅行的消息，我捌想講，無一定會佇佗一个角落仔拄著伊，這个，敢會是伊？
「小姐！借問一下，恁附近有一間大飯店，叫啥名？」我按呢問。
伊頭斡過來，我看著伊的面。（阮同學生做並伊較媠誠濟）
伊應我毋知影！
　
這時陣，我煩惱的，毋是囥佇旅店內底的皮包仔，是皮包仔內底，一个細仔个仔的『零錢包』，彼是一遍去西螺東市場𨑨迌的時買的（相片這个）。

啊！這若是一場夢爾爾，毋知欲偌好咧。
一垺尿自透早禁到今，坐佇輪椅無紮柺仔出來，若毋是無障礙的便所，是袂曉使用的…..
　
＊ ＊　＊
佇尿強強欲疶出來的時，精神，欲衝入去阮兜便所的時，聽著房間窗仔外口的鳥仔聲，若像咧笑我這个𨑨迌夢（我知啦，其實是疶尿夢）………..

這時陣的我，到底是莊周，抑是蝴蝶？