2018.04.01寫

捌佇大賣場停車的所在，看著朋友一台戰車（共殘黨咧騎改裝的機車），佇頂頭掛一个紮輪椅的鐵架仔，問起來，是家己組的，毋是予人做的。
伊講予人做的，無欲用的時袂當提落來，起落無方便。家己組的活動的，無欲用的時，就提落來。
這嘛是我的困擾，因為著紮輪椅出門的時陣無濟，我這台又閣是騎欲二十年的老車，若去予人裝，略略仔換新車，閣重做無彩。
　
後來參阿勳去朋友兜詳細看，翕相轉來兼請教一寡仔技術問題。
　
阿勳用真濟時間去做，對買料、設計到做好，誠無簡單才完成，做好應該嘛有規半年矣，我猶毋捌使用。
　
今仔日伊無佇厝，我共已共架仔鬥起哩機車，共輪椅搝起哩架仔頂頭，出門！
伊若佇厝裡，有人依賴，就無才調家己來。
　
騎機車，無像騎電動的，毋敢走遠驚無電，著看天氣，驚落雨；較輸是，著家己下力落去搬輪椅起落車。
總是，有一好就無兩好，有心媳就無牛母。
　
去斗南一間賣場（會員大會抽著怹的禮券），落輪椅，入去踅…..有夠四序，袂鎮人的位閣扭掠，毋免偌大的空間，就會當自由出入。
佇斗南彼間賣場踅真久，攏揣無我欲買的物件。
問人才知影，原來，我欲買的，攏佇樓頂，可惜欲去二樓干單有電樓梯，無電梯，輪椅無才調起哩。雖然邊仔有一條會當起哩的路，毋拘真崎，落來的時陣輪椅歹擋，會衝落來，危險。
　
這間，無適合阮來遮消費，所以嘛無可能閣來一tsuā，就佇樓跤買一領阿勳會穿得的衫，共禮券用掉。
　
今仔日天氣誠好，轉來的路裡，哪行哪看，佇路邊看著兩、三隻古錐的膨鼠，停落來共翕相，怹攏袂驚人，戇戇仔食樹仔跤的物件。