2018.03.28寫

涼冷的透早，對水道頭承燒水落來洗面，總會想起猶無啥有記持的細漢時，伊呀手裡一條燒燒的面布，ù（敷）佇我拄睏醒的面，面布燒燒的味，到今猶温暖著我的心。
　
這馬共想起來，欲予彼條面布燒燒，提來拭囡仔拄睏醒的面，毋是像這時陣，水道水開開自然有遐利便。
　
頭先，透早先著共水燃予燒，水缸內底的水，是佇前一日去鼓井tshiūnn-tsuí（汲水）扛轉來，若是灶裡的火，家己田裡稻草in的草絪，干但會當起火，無耐燃。草絪內底包較耐燃的樹仔枝，是伊呀參二姆，有時陣去溪底抾、有時做伴去山裡擔，若是較大箍的就囥起來年仔節仔炊粿通好用。
　
阮伊呀誠無閒，除了著去田裡鬥做，佇田裡穡頭làng-phāng（空檔）的時，
揣時間擔水抾柴之外，菜大出的時，會共菜蔬豉起來做Kiâm-tôa（鹽漬食物），伊呀毋但會豉家己種的芋仔、菜頭、結頭菜，阿媽兜有種冬瓜，逐年攏會大大粒載一粒來予阮伊呀豉，曝菜脯是一定愛的，若無蕃簽飯就干但扒，無物通配。另外閣定定食的有豆仔乾佮花仔菜乾。
會使講伊呀是驚阮枵、驚阮寒，驚阮欲耍揣無伴，一khian腹肚生6個囡仔來予伊家己無閒一世人。
　
阮伊呀是佇大家仔百日內嫁娶的，所以，無閒的時自然是無大家仔通鬥跤手，厝裡若有啥代誌，阿爸攏會去［厝仔］共外媽載來厝裡鬥相共。
　
會記得有一年，伊呀身體無拄好，外媽叫伊轉外家靜養……
伊呀共小弟仔tshuā咧身邊，我嘛袂記得怹去阿媽兜蹛偌久，干但會記得彼站仔攏是大姐佮二姐咧煮食款厝內。
　
等甲伊呀身體較好勢轉來的時，砛簷跤囤的彼堆柴，燃了了矣！
Kiâm-tôa甕仔內底的Kiâm-tôa，食了了矣！
　
大姐彼陣仔嘛才十捅歲，伊呀干但面仔憂憂，毋甘罵。
　
伊呀雖然誠無閒，毋拘，佇無閒當中，伊嘛袂疏忽阮的一舉一動。
會記得伊咧in草絪，阮佇邊仔耍，伊會佮阮講話。有一擺伊咧揀菜準備欲煮晝，看我坐佇邊仔，姿勢無好看，伊講：查仔囡仔人，坐予好！
伊袂因為我跤無方便，就kìnn-chāi我變做無一个查仔囡仔款。
彼遍伊共我講：汝七歲矣，對這馬開始，咱無欲閣去看醫生矣。
　
度晬染病到七歲，中醫、西醫無斷過。
　
大漢了後，我想講阿爸雖然是做田人，毋拘伊嘛是知識份子，汰會戇戇仔予我開錢開遮濟年？開甲逐年過年前，總有醫生來討錢！
問過阿爸，伊講：家己的囝，毋相信會袂行！
　
想想咧，我無thn̂g（傳）著阿母有耐心的個性，煞淡薄仔傳著阿爸彼種［我毋信！］的心情。