2018.03.11寫

看人咧耍最近當時行的［旅蛙］。
等待一隻行踪無定的蛙轉來，有人講就親像現代的爸母等待囡仔的心情，嘛有人講是等待心愛的人彼款心情…..
　
我想著我的等待
　
佇度晬的時染著小兒麻痺的症頭，阿母欲予我較早食補，所以提早共我斷奶。彼時阿爸逐工暗頭仔去𥴊仔店坐，參人開講了，就有一項新的任務…買兩塊仔餅轉來騙我睏(彼个騙毋是騙…是華語講的『哄』)，彼時代無奶嘴仔，斷奶的我歹入眠，只好用餅騙。
哪無愛買較濟囥佇厝裡，免予我等咧？因為厝裡囡仔濟个，買轉來，免等甲暗時仔，就無矣！
應該是聽阿母講這段往事，才佇內心生出彼段等待的心情，若無，歲外的我，除了番，會曉想啥？
　
較大漢了後，等待的是阿爸去大喝市賣菜，轉來的鐵馬仔聲，佇菜價好的時，阿爸的菜籠仔內底，會有一个𪐞（暈開）著油的紙橐仔，內底有糋粿。有糋粿就是菜有人欲買，毋免閣載倒轉來做肥！
　
結婚了後，有一站仔阿勳的工課，暗時仔著出門，轉來無一定當時。
暗時仔參囡仔佇樓頂倚台3線彼間房間睏，窗仔門拍開，深夜的大通路頂頭，一台一台快速駛過的車聲，攏毋是阮的等待，阮等的，是慢慢仔斡入來巷仔彼台，會吼足大聲的….雷諾汽車聲！
　
做人的阿娘了後，出外的囡仔一聲：我轉來矣！
是世界媠的聲。
　
年歲哪來哪濟，才有新的體會。
所有的等待，攏參有淡薄仔著急的成份。
所有的等待，會等著袂？其實毋是咱家己有才調主意的。
　
今仔日天氣誠好，敢著像旅蛙按呢，出來去行行咧！
這才是家己有法度主意的代誌啊！