2018.01.22寫

今仔日欲轉去厝歇晝ê時，路邊雄雄一个查仔囡仔對我咧騎車當中傱倚來！

我騎車本成tō誠慢，佇火車頭頭前人佮車濟濟的路段，騎了閣較慢。嘛佳哉擋仔有利，緊擋起來，行佇查仔囡仔後背兩个2大人開喙罵彼个囡仔：「汝是用傱ê欲創啥？」

平安無事，毋拘我有驚著。 　

這幾工是卡著陰hioh？出外定定拄著袂順！ 昨下晡趁歇睏好天好天，想欲去買物件，用的、食ê攏著買。去大賣場會當一遍款徹底，上近ê是文化路彼間全聯。 我較捷來這間買，雖然無大間，但是因為貪著伊ê近，咱欲買ê物件遮大概嘛攏有。 　　

入門，就拄著一kha籃仔擋著路，咧櫃台收數ê工作人員講：「歹勢，阮遮較狹！」 無要緊，我技術袂bái，略仔閃咧、略仔she咧，就過關矣！ 

因為欲挃ê物件囥無仝所在，我坐著快樂馬車（加電動車頭的輪椅），佇賣場內底一chōa一chōa 勻勻仔踅，一項仔一項慢慢仔看，看甲入神，無咧看頭前ê出路是毋是無障礙，欲出來ê時，才看著一台chāi佇遐ê擔仔擋著路。是彼種予人試食、試啉ê擔仔，是活動ê會徙位得。 　

擔仔位無人咧顧，我ê車若欲倒退，著退誠遠，所以我想欲家已共擔仔徙看咧；這時陣，一个婦人人足歹聲嗽對我背後喝講：「汝袂使對遮行啦！汝佇彼爿欲入來ê時，看著這就袂使入來啊！」 我共講：「歹勢！以早會當行，拄才欲入來無看著tō入來！」 伊講：「汝倒退啊！」

我共伊講這台車無好倒退，而且離另外一爿ê出口有寡遠。 伊講：「我徙予汝過啦，後擺莫對遮過！」

其實我會使共伊講：「汝是咧大聲啥？請恁主管出來，擋著我ê路，敢是我ê毋著？」但是我無應伊，因為我無膽，若參人大聲，心臟會tsa̍t起來，誠無爽快。

想著拄看過一个勇士黃博煒ê故事，伊講：這種受岐視的代誌，準做爭贏，心嘛受傷矣！ 佇八仙樂園身軀90%燒著傷 ê黃博煒。 當初醫生講誠無樂觀，隨時有可能失去性命；厝裡ê人毋敢抱希望，因為看這个囡仔受傷遮大遍，若欲共伊救轉來，是真折磨ê過程．

醫生和家屬討論了後，開兩條路予行，一條是放棄急救，放手，予伊去做天使，一條是截掉4肢，存活率也只有5% 後來是黃博煒家已決定，想欲活！ 最後伊是失去了雙跤佮正手，佇評估5%存活率當中活落來．

就像伊講的，知影按呢活落來會足辛苦。 但是，伊可能無料著，外表生做參人無仝ê咱，肉體痛疼ê折磨當中，嘛著閣承受因為岐視眼光所帶來ê心疼． 伊講有一擺伊去買雞排，排隊咧等ê時，突然間有一个媽媽走過來共他講：『先生你可以不要在這裡嗎？等一下我小孩放學會來這裡，你這樣會嚇到他！』 　

他講當時賣雞排ê頭家有想欲替伊講話 黃博煒用眼神阻止伊 他講…佇他ê經驗內底，這種受岐視ê代誌，tō算後來爭贏矣，內心猶是受傷ê，伊講伊干但是想欲享受芳貢貢雞排ê滋味，毋是欲來拍歹心情． 無毋著，我只是欲來享受購物ê滿足，無需要參人爭輸贏。

我佇文化路這間店，啥物攏無買tō出來矣。

去揣適合我買物ê所在，佇一間大賣場，意外看著一kâi有貓仔ê『馬克杯』，是我上合意的。買著這个杯仔，誠滿足！ 閣去一間咖啡店，門口有斜坡，會當予輪椅出入ê友善空間，一入去，鼻著咖啡芳，有幸福ê感覺，顧店ê小姐佇我買了欲出來ê時，共我講：隨時歡迎汝來遮啉咖啡！

賽翁失馬焉知非福的形容，敢會使囥佇遮？總是，我發現天地遮呢仔闊！ 　

是講…想欲請全聯ê頭家，恁這間店若無適合輪椅出入ê時，敢會使佇門口掛一塊牌仔，寫講【這个場所無適合輪椅出入】? 莫予阮入去了，才抱著一粒受傷ê心離開～