昨昏讀冊會，有同學講著以早人辦喪事，有咧做［sai-kong-hì 司公戲］，會記得這項我毋捌看過，我干但捌看過［lāng-lâu 弄鐃］，是佇3姆過身的時陣看過的。3姆是我出世了第1个永別的親人。

彼下晡，我佇門口埕看阮阿娘絪草絪，3姆有對邊仔行過，去閘門跤彼坵田看怹查仔囝素姐做穡，行倒轉來無偌久，素姐工課做了，坐落來參阮阿母講一時仔話，轉去欲煮暗頓，入去3姆的房間，就聽伊大聲哭阿娘。一个人遮緊就無去，予我想著足驚惶。

頂日講著彼个［彼爿的大伯］，是佇3姆過身了無偌久過身的。

經過3姆的喪事了後，這遍我就較袂遐驚；毋拘誠毋甘怹彼个孤查仔囝。

彼爿大伯生5个後生，干但生一个查仔囝。

大伯過身了後，無論做七、做旬、做百日、做對年，怹查某囝攏著哭路頭。

對外口廟仔公彼kōo爬的哭轉來，彼時陣我會想講，哪無愛生較濟查仔囝咧，予伊家己一人孤單爬、家己哭，怹老爸過身，看起來伊上可憐。

會記得伊咧哭的時，喙裡一直叫［娘爸］。毋拘，伊阿娘都猶佇咧，汰會哭阿娘閣哭老爸？

頂個月讀冊會，聽沈老師講［良爸］這个詞，我才理解。原來是良爸、良嬭（阿爸、阿母）。毋是我一向認定的［娘嬭］，哭路頭的查某囝，哭的時［良爸］毋是［娘爸］。

內心有真濟無清楚的字句，用家己的想法去理解，有時陣離真正的意思誠遠，足無妥當。佇認捌台語文了後，tāu-tāu-á理解矣。

我知影，一定閣有誠濟我猶無清楚的語詞。每一遍得著解答，就會有講袂出來的歡喜。

佳哉我出世佇會赴認捌台語的年代。