逐遍寒流若來，攏會感覺講，若像毋捌遮寒hoⁿ？
其實是寒過、熱過，彼个感覺就放伊去，袂去共記牢咧。
　
但是有一種溫度，永遠都佇咧。
彼就是寒人咧睏的時，阿娘用伊的雙跤，gia̍p我這雙冷吱吱袂行的跤，ù予燒通好落眠，彼个溫暖，若像天跤下永遠無冬天。
　
大漢熟悉較濟『身障同胞』了後，講起爸母用怹身軀的燒，溫暖循環系統無好的阮，竟然袂少人有這種經驗。
　
彼時都無面冊嘛無『賴』通交流，怹汰攏會曉用這个撇步共阮惜？
　
寒甲強欲khiû去的這時，想起物質缺欠的年代，爸母予咱佇寒人有一个溫暖的暗暝，遐爾仔寶貴，使人懷念！