我袂記得彼是毋是初一、十五？干但會記得伊定定會捧sok-chhâ（台日字典解說：下落去香爐燒ê香木片）入去公廳燒。著！就是燒著四界有清芳味ê物件，是一个誠講究生活品質ê老人。
　
［彼爿ê大伯］生做誠嚴肅，我袂記得伊講過啥話，干但會記得有一擺，我佇塗跤爬，參囡仔伴咧ī覕相揣（阮講是耍thau-su-kheh）毋知有人按呢講否？
　
西爿有一間土角厝，無人蹛，已經崩去矣，是一个足好覕ê所在，我咧耍ê時，穩心仔ku佇遐，想講這聲一定無人揣會著我，我就免做鬼矣！
內心當咧得意ê時，對後背傳來一聲：吼！
有夠大聲，我舉頭看著一人穿烏衫ê老人，手裡彼支老人枴仔舉懸懸，穩是欲拍共伊吵著ê我。瞬間我感覺若像天落落來，閣若像規身軀去予電電著，彼毋是［驚］這字會當形容ê驚惶。無人揣會著免做鬼，驚一下險險仔去陰間做查仔鬼仔。
想欲緊閃，袂曉走、欲爬，爬袂緊。後來按怎離開ê，我已經袂記得矣。毋拘我會記得，共我嚇驚著彼个老人，就是［彼爿ê大伯］。
　
毋是講伊無愛予我覕怹ê土角厝，伊就是孤老。毋是！
　
伊閒閒，定定一支掃帚紮咧，四界巡，若看著塗跤有雞屎，掃帚提咧就共雞屎hòo掉，誠清氣相著否？
當然毋是！
　
尾暗仔阮這爿叔伯阿嫂若對田裡轉來，咧收竹篙ê衫仔褲ê時，定定著揀幾何領起來重洗，因為彼爿大伯只是共擋著伊ê路ê雞屎清掉，清對佗去？伊無管，就算共阿嫂nê佇竹篙的衫仔kō甲lah-sap-li-lô嘛佮伊無tī-tāi。
　
阿嫂會投hông聽，人會講：伊都孤老！
因為彼爿大伯佇彼時是輩份真懸ê長輩，無人敢去共講按怎。
　
我就是佇一遍閣一遍人咧會ê：「伊都孤老！」知影這句話ê
- - -孤老koo-láu。