早起睏飽去菜市仔，看著一台警察車，咧趕路邊擺擔仔的人。
落雨天，生理大概加減有較差，若閣hông開罰單，就無彩假日出來咧擺擔。
　
菜買了，倚一擔定咧共買的社頭襪仔，伊欲提予我的時，看伊足歹出入，伊笑笑講：拄才警察來，徙一下煞無跤路。
　
問伊：敢有hông開單？
應講無開，警察咧趕，徙較入來，配合一下伊就袂開單。
　
講是有人檢舉，警察就愛出來處理。警察嘛是食人頭路，對檢舉人著愛有一个交待，咱徙一下，伊放咱過，互相予對方好做工課。
　
聽伊按呢講，無怨無嘆，顛倒體貼別人的立場，誠感動。