會生囝袂會教囝，是無各樣會曉栽花袂曉沃水，會曉播稻袂曉挽草。這種婦人儂袂堪得做囡仔的老母，只好做雞仔囝的雞母。

* * *
會記得阮阿爸對雞母chhōa雞仔囝有另外一種見解

阮阿爸捌講，咱著學雞母chhōa雞仔囝的精神。該疼就疼、該放手就放手。
　
雞仔囝細仔隻仔的時陣，雞母若tok著一粒米、抑是一尾蟲，伊家己攏毋甘食，kok-kok-kok，大聲叫雞仔囝倚來食。
　
啊若看著lā-hio̍h（老鷹）天頂飛，就緊急呼雞仔囝，共âⁿ佇翼股下面保護怹，lā-hio̍h若飛落來，雞母跳上跳下共伊拚。為著欲保護囝，無顧家己的性命。
　
等雞仔囝較大隻，會曉家己揣食的時陣，雞母會共雞仔囝趕走，若是雞仔囝留戀毋肯離開，伊就用喙共tok。囝大漢，去獨立。阿爸講咱人，會毋甘大漢矣的囡仔離開，這，咱的確會使向雞母學習對囝的放手。
　
是講，講的較快；阿爸嘛是希望伊的序細上好會當莫離開厝呢！
　
閣想著一个參雞母有關的詞…nōa-pū。
這是細漢時陣聽阿母講的。
岫內底無卵矣，雞母閣ku佇內底毋肯出來，阿母講彼是雞母咧nōa-pū。這時陣著共潑水予雞母精神起來。
　
到今我猶袂明白，是啥原因予雞母留戀內底無卵伊的岫，毋肯離開？