毋知對佗一年開始，會記得是錄影帶猶閣是大塊ê彼陣仔，哥哥為阿爸hak一台錄影機，便若是新曆過年，哥哥會用上緊ê速度，提著日本ＮＨＫ紅白歌唱比賽ê節目帶予阿爸看。阮會綴咧看，雖然阮聽無主持人咧講啥，但是聽有歌曲ê旋律tō誠快樂矣。
　
彼年代，網路無發達，雖然錄影帶已經提到厝裡，猶是毋知影是佗一隊贏，（查埔歌星是白隊、查某歌星是紅隊），阿爸會曉聽佮講日語，ná看會ná講予阮聽，嘛會臆看佗一爿贏。
　
錄影帶對大塊ê看甲細塊ê。後來佇厝頂尾裝一台接收日本節目ê盤仔（衛星接收器），阿爸欲看日本節目，免去借帶，會當仝時陣看著日本播出ê節目。
　
到這馬猶閣足愛聽ê這條歌- -【おまえに惚れた】，毋是對阿爸遐知影ê；彼時我佇事務所做工課，一日安靜ê下晡時仔，一个蹛三芝生做大大箍ga-suh店ê頭家來接觸代誌，遠遠ê路仔就聽伊咧唱. . . 惚れた(惚れた)　惚れたよ おまえに惚れた
毋知啥歌，tō是聽著足合意，旋律共伊記牢牢；無幾日，聽著阿爸嘛咧哼這條歌，哪會遮拄好？阿爸講這是美空ひばり唱ê歌，後來就捷捷佇日本ê歌唱節目內底，看著美空咧唱這條歌。