著啦！就是謝平安，我汰會袂記得這个詞。細漢時陣ê謝平安，佇廟仔公遐有做戲，做戲鬧熱ê聲音會傳甲阮厝來，餳著一个愛耍卻予無方便身軀束縛著咧ê靈魂。
　
廟仔公離阮厝真近，閘門跤出去，倒斡、閣倒斡就到矣。

彼年，猶佇塗跤爬，也就是猶未7歲，因為我7歲開始徛起來學行路。

佇一个謝平安ê下晡，我家已爬出去閘門跤，ku佇戲棚跤，看布袋戲咧演武松與潘金蓮。

到今猶會記得，布袋戲尪仔做ê潘金蓮，生做足幼秀，面妝甲誠媠，心情完全囥入去彼齣若捌若毋捌ê故事。
　
雄雄一條chhiū-leng-khong-á（橡皮筋）phiak對我身軀來，毋是kài疼，毋拘誠驚。
　
當我咧揣看是誰共我phiak ê 時陣，又閣一條phiak過來，一个查埔囡仔，用誠無友善ê眼光看我，我毋敢閣再繼續看戲，爬咧，緊轉厝。

這馬想起來，我都無做毋著，是按怎毋敢反抗，恬恬仔投降？是自卑感所致！
　
Hông欺負雖然誠驚，毋敢講，因為彼時陣阿爸對序細ê管教真嚴，雖然庄裡若做戲，阿爸會去戲棚跤買甘草菝仔轉來予阮食，毋拘阿姐若欲參人去看王祿仔，阿爸會罵，我爬去看戲，大概嘛袂使得，就共這个驚，藏佇心肝底，予伊家己慢慢仔消退。
　
另外一層代誌，會記得嘛是發生佇謝平安。

彼年，我已經蹛佇仁愛學校，謝平安這一工，我的叔伯小妹阿惠，嘛讀仁愛學校，怹老師欲帶怹彼班ê同學去予阿惠怹請，我就順續予老師簽外出（蹛學舍著有大人簽名才會使離開學校），參怹坐車轉去故鄉。
彼个年代謝平安是一个足大ê節日，每一个庄頭謝平安ê日子無仝，蹛無仝庄ê親情會來厝裡做人客，食腥臊。
　
彼日，大舅、二舅佮其他親情，坐滿阮請人客ê桌仔。阿母共上尾一項菜捧起桌頂了後，人無爽快，欲行入去房間歇睏ê時，暈倒佇hō͘-tīng-kha（門檻）。
　
年仔節請人客，著無閒ê代誌太濟..... 往過若欲請人客，阿母會參阿爸參詳菜色，捌聽怹咧會：刣佗一隻雞、掠一隻鴨，買幾斤豬肉，魚仔煮五柳枝、金針、木耳、鹹菜佮瘦肉，結做一虯...阮會提這項菜來唸，講是金針木耳，拍結手指。閣有其他濟濟平時仔毋捌出現佇桌頂的膨沛。
彼遍謝平安阿爸人佇台北無轉來。
阿娘暈倒，有人緊共插去眠床予theⁿ咧，做醫生ê叔伯姐夫，不管時共醫藥包紮佇身軀邊，有人緊去佇大伯兜食腥臊ê叔伯姐夫揣來，注一支射，伊呀睏去矣。
　
彼暝，我睏袂落眠，有淡薄仔怨嘆阿爸。人客彼濟，阿娘家己一个，也欲煮、也欲招呼人客，面對外媽兜來ê伊ê兄弟姐妹，著替無轉來ê阿爸解釋…..伊呀會暈倒，參阿爸無轉來一定有關係；我按呢想。
　
第二工透早，我坐佇厝前ê門口埕，等阿惠怹ê車，著轉去學校上課。伊呀身體無拄好，我實在足行袂開跤。
　
伊呀對內底行出來，我看一个齊放心，因為伊像往過按呢，面帶笑容參共我講，免煩惱，伊呀無代誌矣，去學校著乖乖聽老師ê話。

我內心有千萬句想欲講ê：無愛去！
卻是誠乖應講：好！

彼時阿娘四十捅歲，伊佮我攏毋知影，彼是上尾一遍佇故鄉謝平安。
第2年熱人，全家離開故鄉，去北部稅厝，流浪過日子。

昨暝我蹛這所在謝平安，想著遮的往事，心肝頭有酸酸ê味！