讀白話字文獻，定定聽著老師講著巴克禮牧師推捒白話字的貢獻。
知影台南有一个巴克禮公園，有閒，就想欲去行行咧。
　
前一暝，阿勳問我敢知影欲按怎行？
我講我是一个路痴，請伊去問孤狗地圖較穩。
　
兩台快樂馬車(輪椅加電動車頭)，頂回坐自強號去台北的經驗無四序，上車了後欲入去車箱內底，彼个死斡，比36彎閣較歹行，坐區間車的門較闊，橫直無咧趕，就坐慢車對斗六出發。
　
一路的天氣，攏是殕色的，看著心情嘛綴咧變殕色的，這種天氣，風景敢有啥好看？
　
其實免煩惱，台南的天氣，親像台南人的熱情，無予咱失望。
　
落車欲去公園，按怎行？阿勳做前我綴後，一直行，伊一路攏無問人，無偌久，巴克禮公園真正出現佇面頭前；這若我家己來，一定問人超過規十遍。