鹹圓仔

我足愛甜的物，毋拘，若是冬至的圓仔，我定著是食鹹的食甲siuⁿ飽才欲共碗囥落去。

佇冬至前彼个暗頓食鹹圓仔，這是對外家紮來的習慣。

昨昏下班siuⁿ晏，僫款料，今仔日請休假，睏甲飽才去菜市仔買菜。茼蒿仔是煮鹹圓仔的主角，我閣愛一味，囥寡仔hô-lân-tāu（豌豆），有一種特殊的好氣味。對西市踅到東市，就是揣無人咧買hô-lân-tāu，有賣菜的共我講，甜豆嘛共款啦！我知影彼絕對無仝。

西市買菜的阿桑講，hô-lân-tāu貴甲，伊毋敢提轉來賣。

佇菜市仔踅的時，看著一个濟歲的阿婆仔，坐佇輪椅予序細捒佇菜市仔，行來行去，無成咧買菜，若像來看冬至菜市仔的鬧熱。我踅幾何lìn，攏拄著怹。

菜買好，佇轉來的路裡，咧想，老是人生的過程，閣免幾年，我就會像彼个坐輪椅的阿婆，無才調款料，煮好食的鹹圓仔，予厝裡的人佮家己享受。

煮好，食飽矣，想欲閣貯一碗….想想咧，毋通像阿娘講的：喙飽望毋飽（一般攏寫喙飽目毋飽），有可能我聽毋著去，但是我曾細漢就用家己的想法，解說這句話：腹肚飽矣、欲望猶不足。

我若老矣，毋通［望毋飽］，著做一个恬恬仔老去的人！隨緣、自在，這是我愈來愈著愛學的心境。就親像無參hô-lân-tāu，減一味的鹹圓仔，嘛感覺好食！