尾暗仔下班，等佇超過100秒ê青紅燈跤。
　
日頭落海了後ê光線，覕佇樹欉後壁，參伊相相，煞生起一陣略略仔酸ê郷愁。
　
故鄉座東向西ê護龍，尾晚仔時ê戶碇跤，定定覆一个愛哭仔，看落海ê日頭，等伊呀對田裡轉來ê身影：「阿～伊～呀～哦！」一聲牽過一聲，阿姐佇灶跤煮食，行過一回喝一聲：「莫閣哭啊啦！」
　
雖然人蹛佇厝裡，等待心愛ê人，一分一秒都僫得忍耐，這，我看做是鄉愁情懷。
　
十捅歲仔離開故鄉，和美彼間仁愛學校教室ê邊仔，日頭溜對一爿綠色田洋ê彼頭，紅phà-phà，鄉愁對遐浮起來，nǹg入心肝頭。思念故鄉ê親人、覕佇棉被底，毋敢大聲哭！
　
結婚生囝了後無閒甲，共鄉愁囥佇尻脊後。
工課做袂去，共囡仔寄轉去台北予序大人照顧。
黃昏時，敲電話予囡仔，電話講了，阿媽教孫，共媽媽講再見。
囡仔共電話tu予阿媽，毋肯講！
阿媽問伊汰無愛講再見？
囡仔講：毋知按怎，看著日頭落山，就想欲哭！
　
乖囡仔，媽媽了解，彼種想欲哭ê情緒，叫做鄉愁。
　
講起日頭落山ê心情..