野馬插翼

2017.12.10寫　

最近出外參加活動，若無輪椅通坐，活動結束肩胛頭攏會酸疼幾何日。

　
阿勳佇我的機車做一个載輪椅出外用的架仔，做好成久矣，想講起落輪椅會誠費氣，就無去用伊。
　
今仔日共試用看覓，是有淡薄仔困難，毋拘，想著昨昏彼个活動的場所，就感覺紮這台輪椅的困難，加真簡單。
　
昨的舞台搭佇草埔仔頂頭，我干但對停車的所在行到內底，著歇幾何遍，天氣寒，衫穿濟領，規身重汗坐一時仔就畏寒。佳哉後來合唱班班長共輪椅讓我坐。
專門為身障者辦的活動，場所設佇這種寸步難行的草仔埔，我毋知主辦單位咧想啥？
　
共輪椅扛起哩機車頂頭，無十全的人生，又閣克服一難關矣。
　
細漢佇塗跤爬到7歲，阿爸取兩枝竹仔予我做枴仔，教我徛起來學行路。
　
徛起來的視線，比佇塗跤爬較闊；內心有一種挑戰成功的驕傲。天公伯矣，你看，你無欲予我行，今我行予你看；這馬想起來，這款的宣誓，真正是戇人毋知天地幾斤重！
　
去仁愛學校讀冊開始穿鐵鞋，鐡鞋穿咧徛著閣較挺、較久，毋驚跤酸。內心有一種『人定勝天』的喜悅。後來的生命過程予咱知影，這是非常幼稚的勝利感。
　
囡仔出世了後，去學開車；對完成毋捌提過車鎖匙到提著駕照，用21工的時日爾。彼時的心情，當然嘛是佇內心共天嗆聲：看啊！毋予我行，我對行路到開車，攏學會曉矣！

今，體力愈來愈bái，需要的輔具哪來哪濟。若像武者的武器，一項仔一項hông收起來，天公伯矣若會記得我一路行來，一直憨憨咧共嗆聲，大概會笑我真正是一个戇囝！
　
出外遮呢無方便，無..咱就莫出去，乖乖仔踮厝，做一个認命的人？
若按呢，我就足對不起家己彼个愛耍的靈魂！
　
會記得讀高職的時陣，捌聽過老師講：咱一世人的辛苦，天爸攏有咧看，咱著一世人拍拚，等到轉去天家彼日，才會當無見笑共天爸講：我這世人無白過！
　　
彼台舞輪予我成功扛起哩架仔，詳細看，這，根本是佇我這隻野馬身軀頂頭插翼，欲飛出去矣。
毋拘，無像往過一坎一坎進階的勝利感。
　　
干焦按呢想；若有一日，轉去天家，我欲共天爸講，我這世人認真做一个你指派的身障者，無辜負你交代的任務！
　
而且，我會誠謙卑、誠謙卑來要求，後擺，做人這種苦差事，請莫閣派我去。
　　
尤其是去做一个，愛耍的靈魂，束縛佇行動不便的身軀，予爸母操煩一世人的『跛跤仔囝』！