 
字體：小 中 大 |
|
|
|
| 2017/12/12 11:09:57瀏覽203｜回應0｜推薦4 | |
花貓-2 2017.08.14 佮這隻貓仔結緣，是佇阮飼ê貓咪無去了後，囡仔對台北轉來，提貓咪食無了ê飼料，飼這隻來佇門口lōa-lōa-sô（邏邏趖 ＊遊蕩）ê花貓，飼一遍爾，第2工了後，差不多逐工來討食，到尾矣共遮當做是飯店，閣食好鬥相報，順紲chhōa（帶）一隻烏貓來食。
厝裡ê飼料食了矣，就閣去買來共飼。 這兩隻，透早5點外就來叫阮起床。 花貓生做細細隻仔，看起來若像貓仔囝，其實阮去予伊ê外表騙去。 當伊ê肚腹一日一日大，阮掠作伊好喙斗食甲肥起來。 毋是肥...伊有身矣！ 一、兩個月進前生3隻貓仔囝，定定看怹佇隔壁ê厝後咧耍，後壁路仔路面無平，輪椅pháiⁿ過去，我攏遠遠看怹一家咧享受天倫之樂。 頂工早起時頭一遍共3隻貓仔囝chhōa來門口，阿勳提罐頭予貓仔囝食。 才咧歡喜貓仔囝嘛會來予阮看矣，過無幾工，一睏仔囝3隻貓仔囝攏無影跡；阮咧臆有兩種可能。若毋是愛貓仔ê人抱去飼，就是討厭貓ê人掠去掞掉..... 貓仔囝無去彼暗，貓仔母哭甲誠悽慘，聽著足毋甘。 伊定定爬起來我輪椅ê跤踏枋，恬恬予我共摸、共惜，面容有享受ê模樣。 貓仔囝紡見去第2工我轉來歇晝，貓母又閣來門口，叫甲誠大聲，阿勳講伊飼過矣。 我知影，彼个聲毋是咧討食，是阿母咧想囝ê哭聲。我出去共看，貓爬起來跤踏枋就無咧哭，目睭掠我一直看，像咧求救，我共看一下詳細，可憐...伊咧脹奶，腹肚腫腫腫，看著我差一點仔哭出來，因為我知影脹奶ê痛苦，會使講是比生囝較疼。 這大概是伊人生上痛苦ê時陣，身體受脹奶ê痛苦、精神上又閣有失去囝兒ê拖磨。 我輕輕搓著伊ê身軀，共伊講：貓咪，這就是無常，汝疼愛ê囝無張無持就無去矣，咱一點仔能力都無法度；下世人，莫閣做貓，知否? 伊躺佇跤踏枋誠久，一點仔都無想欲落去；我知影按呢陪伴伊，會減輕伊ê痛苦。毋拘、我下晡著上班，中晝未食飯，袂當陪伴伊傷久。 我吃飯飽欲入去房間歇睏ê時，伊猶佇走廊咧theⁿ。 倒佇眠床，我根本都無才調歇睏，規頭殼都是貓咪脹奶ê畫面。 除了佇內心聲聲唸佛，祈求慈佛照護無辜ê小性命，我毋知欲怎幫助伊.... 欲上班ê時，伊聽著機車騎動ê聲音，就對塗跤爬起來跳對牆圍仔頂，覆咧看我機車騎出去，感覺伊無像拄才彼艱苦矣；內心深深感謝慈佛有照顧... 貓仔囝無去到今仔日，差不多第5工。 貓仔母脹奶ê情形有較消退，飼料嘛較肯食矣。 暗頭仔伊又閣爬起來我跤踏枋，我像往過按呢，予伊坐佇跤踏枋，載去溪仔邊吹風納涼。 伊若像足愛坐輪椅，佇溪仔邊坐足久，無欲落去ê範勢。橫直我無咧趕時間，就據在伊欲坐偌久，就予坐偌久！ 突然間，一隻花草佮伊一模一樣又閣平平仔大隻ê貓仔，對駁岸頂頭跳落來.... 這隻貓仔母傱過去，我驚怹冤家，恬恬仔共看...對方警察心誠懸，對這隻貓母大力歕氣。....貓母竟然倒落去塗跤，身軀péng（翻身）幾何輾，是向對方表示友誼ê動作！ 無偌久，兩隻貓一前一後走對暗暗駁岸邊ê巷仔尾去矣。 失去囡仔ê疼，伊是已經慣勢，抑是認命？.....我毋知影！ ＊相片是貓咪脹奶時共翕ê
|
|
| ( 心情隨筆｜心靈 ) |
