花貓-1

2017.07.27寫

厝邊有兩隻貓，一隻烏色ê、一隻花仔色ê，差不多逐工透早，五點外就來叫阮起床，阿勳惜貓，聽著貓咧喵～閣較早伊都是用上緊ê速度起床，去冰廚提罐頭、攪飼料飼貓！

　
烏貓較敏感，用手共摸伊隨跳起來，無欲hông惜。
這隻花貓，食飽了後毋走，頭起先叫是伊食無飽，閣共飼，毋食。
後來逗逗仔知影，是咧討人共伊惜惜
　
就是按呢！爬起來輪椅ê跤踏枋，恬恬仔予咱共挲，手停起來掀報紙，伊會共頭taⁿ起來- -叫一聲，若像咧抗議。

汰無愛共伊掠入來飼？
袂使得！
　
頂日仔伊拄生ê 3隻貓仔囝，當需要母愛，伊予貓仔囝食母奶。我想，佇咱遮得著滿足ê愛，就有氣力轉去愛伊ê貓仔囝。

從到今，攏毋捌tshuā貓仔囝來予阮看一下，干但佇厝後壁遠遠ê所在，看伊咧惜貓仔囝。

早起貓仔ê主人共我講，3隻貓仔囝；一隻烏ê、一隻佮貓母共色、一隻是柑仔色ê。

規工，我都咧想，貓仔囝生做像貓公、像貓母嘛才兩色爾，彼第3色ê貓仔囝，是按怎來ê？

問貓仔母，伊歹勢講- - -
因為....伊是...花貓?

我想siunn濟，伊講彼是傳著（thn̂g-tio̍h）祖先的色水啦！

愛、雖然迷人，總是著出對自然無勉強，才會自在。

惜貓，嘛是按呢！