夢裡的火車頭

2017.06.27

彼个火車頭，已經毋是第1遍佇夢中出現矣。前站仔夢見參阿爸欲去坐火車，對後站入火車頭，到位，火車駛出去矣。　
　
昨暝，又閣對彼个後站欲去坐火車；這遍毋是參阿爸。
是參伊呀佮姐妹仔；欲出發矣，干但我ê行李袂赴款，鐵鞋穿穿咧~閣褪掉（活欲急死，毋知咧創啥），尾矣干但揹一kha平時仔上班咧揹ê揹仔，無穿鐵鞋tō出發。

路裡拄著叔伯阿姐- -阿こ，面仔笑微微咧相借問，彼呢少年、彼呢春風....
閣拄著叔伯阿嫂- -阿ぶ，嘛是笑頭笑面，彼呢幸福，彼呢滿足...

火車閣5分鐘就欲起行，阮閣佇路裡咧趖，足著急、足著急..著急甲精神！

阿こ姐姐已經過身幾何年矣！過身進前，袂行，坐佇輪椅面憂面結，病疼予伊有滿腹ê怨嘆，笑頭笑面早tō毋知走去佗藏。

阿ぶ阿嫂，3个後生偆1个，渡日像leh坐監；雖然唯一ê後生已經娶某生囝，有孫通弄心頭猶原袂輕鬆。予天liô去兩塊心頭肉，怎樣叫伊心袂疼？

雖然夢裡參阿母相見誠歡喜，毋拘，敢會使莫閣去彼个火車頭？