無閒了的放鬆

2017.06.24

這成十工，誠無閒；差不多逐日攏超過12點才睏。我其實知影，無閒煞身體大概會擋袂牢。
真正予我料著....
拜4暗公事、私事一个階段了後，拜5天欲光的時，嚨喉燒熱疼，疼甲精神。
想講..加啉寡仔滾水應該tō無事。
　
擋甲下班時，已經疼甲袂曉講，緊去揣醫生....
共醫生講，第2工有活動，敢會使予我藥仔食落人袂siān閣緊好的？
醫生講4點鐘食一擺，應該真緊會改善。
　
昨暝半暝仔起來啉幾何遍滾水，想講手搖車大概免耍矣。

早起起床，雖然無完全四序，毋拘...若像會使出門矣，而且今仔日的行程，干但佇西螺市區踅爾...就去參加！
　
天氣是熱甲叫毋敢。
毋拘當當手搖車行佇西螺溪橋橋跤的時，路邊樹欉的翠青、藍色天空伴白雲，想講，佳哉我有來，若無，這種藏佇橋跤媠媠的景緻，汰有機會看著咧。

手搖車一排十外台，每一台頂頭攏坐一个追夢的［共殘黨］黨員；會當騎車，彼是偌爾仔偉大的夢想啊.....阮竟然遮呢好運！

感謝協會工作人員的照顧，予逐家平安完成一遍閣一遍的行程！
　
我確定、感冒驚愛耍的人，身軀大量流汗了後....睏一下晡...阮又閣是一尾活龍嘍！