淹水的記持

2017.06.02

袂少人共早起淡水淹水ê相片PO佇面冊，這个景予我想起彼當時！
嘛是這款「4月芒種雨、5月無ta塗」ê季節。
彼日下班了後，像平常時仔按呢，閣去打字行練習中文打字。我打字速度無緊，無咧趕ê文件，頭家娘會提予我拍字順續練習速度，共頭家娘交予我ê幾件仔公文拍了，已經無早矣。
　
行出打字行，才發覺雨落袂細，是講［淡水攏嘛這款天，阮ê雨傘囥門邊］。
這句話是會計事務所頭家娘講予阮聽ê；伊講這就是- - -以早淡水規年迵定定咧落雨，…有人欲共『下雨天』當做『留客天』，毋拘毋是每一个人攏是受歡迎ê，才會有這句話產生；共人講，淡水定定嘛是咧落雨，啊門邊有囥雨傘佇遐，恁會使舉轉去！
　
既然淡水定定這款天，雨幔穿咧、機車發動，向厝裡ê方向直行。
　
這日ê雨有夠大，毋是淡水定定咧落彼款雨，行甲半路，真濟騎機車ê攏落來牽機車；原來機車熄火！
　
我看著這个情形，毋敢閣進前。內心著急，厝裡ê人一定咧等我轉去食暗頓，彼个年代無手機仔，半路欲揣公用電話嘛僫揣，等一睏仔，我觀察著- - -若是車輛駛過ê所在，水tō會閃開成做一條水無蓋滿ê路，我佇路邊等機會；無偌久，看一台計程仔欲駛過水，我tō綴佇伊後面，油門直催（阿維捌教我，機車若是騎佇水裡，油愛一直催，煙筒管才袂入水，機車才袂熄火），總算予我平安渡過淡水河淹水ê路段，總算安全騎轉來到厝矣！
　
機車才佇樓跤咧停爾，伊呀就傱落來接過我手裡ê物件，伴我慢慢仔爬起哩4樓公寓ê厝裡。
早陣阿維下班轉來，看我抑未轉來到厝，機車騎咧欲去淡水揣我，到竹圍仔煞予人苦勸講毋通過，無路矣！
伊佇竹圍仔等我誠久，轉來厝裡講- - 等無我！
　
起哩到4樓，門拍開，規家伙仔攏咧等我，規桌頂ê飯、菜抑好好，無人動碗箸；伊呀三枝清香點to̍h，佇神明公媽桌頭前，一直拜、一直拜！伊呀咧感謝神明公媽有保庇，予我平安轉來到厝裡。
我看著足不忍心，汰會予怹遐煩惱？
　
：「我入去共澹去ê衫褲換掉！」
入去到浴間仔，目屎忍不住流落來；是驚惶行過一段險路、嘛是感動親情ê溫暖！

三十外外年矣吧？
彼桌無人動箸ê暗頓、佮伊呀三枝香舉咧一直拜ê身影，明明明刻佇我ê心肝。