 
字體：小 中 大 |
|
|
|
| 2017/12/10 16:59:01瀏覽288｜回應0｜推薦8 | |
新娘花 2017.03.26 手捧新娘花，頭仔犁犁犁，舉頭看，不知不覺得欲行過30个春夏秋冬。
化粧台蛀去欲車掉，玻璃櫥頂頭ê新娘花，猶假若新ê，雖然彼日ê新娘，已經行入老人ê歲月，拜別爸母ê情景，若像昨昏。 人愈老，愈會當體會爸母ê用心。 欲嫁來南部，淡水到斗六ê路程無算近。有人建議阿勳，叫我來斗六飯店予怹娶，按呢較袂因為路遠，時間歹按算。 阿爸誠堅定講：我ê查某囝，我欲對我ê厝嫁出去，汝欲娶去佗，我無意見！ 後來阿爸共我講，伊毋是欲刁難人，是我跤無方便，無愛予人講，伊凊彩我共嫁嫁咧。 所以….牽著新婚3日ê翁婿，作陣欲轉阮外家來(娶路雞 歌詞)…頭轉客轉去到位ê時，轉到外家巷仔口，阿爸［封巷仔］請人客。 敬酒ê時，阿爸徛佇阮身軀邊，舉杯共人客講：今！怹行路無方便，阮就佇遮共逐家總敬。 一杯，敬所有ê人客！ 有人問我，汰有彼个勇氣，對淡水嫁來到斗六。 彼時少年毋知驚，無想遐濟，即馬想起來，阿爸為著我欲嫁，伊毋知渡過偌濟睏袂去ê暗暝，咧想看，欲按怎替我辦一个適合我ê婚禮。 阿爸，盈暗我敬汝一杯，雖然我無生查某囝，毋拘歲月教會曉我，略略仔知影，做一个查某囝欲出嫁ê老爸，是啥款ê心情。 希望歲月像這葩塑膠花...永遠光艷美麗！！ 莫戇矣！...我若像有聽著人按呢應。
|
|
| ( 心情隨筆｜心靈 ) |
