 
字體：小 中 大 |
|
|
|
| 2017/12/10 16:24:31瀏覽180｜回應0｜推薦2 | |
|
貓咪！等汝.....
2017.02.03
昨暝載貓仔去注射轉來，想講伊兩、三日無啉無放，就一直想辦法予啉病院提ê營養品；半暝仔起來，看伊閣吐一遍，早起特工較早起來，共灌藥仔。
哪款早頓，哪觀察，伊恬恬跔佇彼碗水ê邊仔，看是欲啉水，卻是一喙都無啉。心內咧想，若閣這个形，中晝下班才閣載來予醫生看。 拄攢欲出門，貓仔吐一堆，透早用真濟時間共飼ê藥仔，攏吐掉矣！ 吐了，拖著沉重ê跤步，行來頭前間仔，掠我金金相；伊差袂曉講出喙：我真艱苦，tshuā我看醫生！ 決定早起請假，tshuā去揣別間規模較大ê病院.... 知影貓仔身體無爽快，閃過地下道較袂tiô，會當減輕伊ê疼。 行對庄內，頂兩日賞花ê花田，已經攄做水田.... 閣較繁華，都攏會過去！ 一到病院，醫生共貓仔抱起來，隨共我講：蹛院，著導尿、注大筒ê、檢查.....緊急當中，予我一个數字，問我敢有啥想法？ 意思就是，這筆錢敢欲開？ 我講：緊替伊解除痛苦，其他ê...等一下才閣講。 因為醫生講，貓的膀胱像石頭遐tīng【硬】，彼種痛苦，我感同身受。閣有啥乜比解除伊ê痛苦閣較重要？ 逼伊啉水、原來是咧增加伊ê痛苦啊！阮實在無知，莫怪伊一直咧反抗。 醫生動手進前，共我講：做檢查佮處理，因為著注麻射，有時陣有生命ê危險，這我愛先予汝知... 聽著這句話，佮想著貓咪這幾日的痛苦，這咧時陣，目屎已經忍袂牢；醫生看我流目屎，緊共我講：小姐、汝先莫傷心，一般攏救會轉來，只是伊受苦、汝開錢，按呢爾啦！ 醫護人員舞一睏...導尿....抽出來一大碗含血ê尿，看著心肝又閣一陣毋甘ê搐疼，真失禮啊，貓咪，共汝飼共按呢生。 抽血檢查、照超音波、注大筒射...總算告一段落，醫生才坐落來解說予我聽，有可能致病ê原因佮預防ê方法，順續等檢查結果。 伊講這隻貓若慢一工送去，可能伊嘛毋敢收、嘛有可能佇路裡就去矣..... 我講從伊毋放尿彼日開始，就tshuā去注射矣，汰會無看著伊遮嚴重？ 我咧怪前一个病院ê處理方式，醫生講我若tshuā來遮，病情無甲遮嚴重，伊嘛是會像前一个醫生，先注射、食藥仔按呢處理。也就是講，治病嘛有一定ê SOP？ 伊講，真濟飼貓的人，掠準看過醫生，貓仔恬恬，就無代誌；其實伊是艱苦袂曉唉。 講起來，嘛算是這隻貓咪家己用伊ê方式，叫我莫上班，tshuā伊看醫生。因為伊透早彼下吐，若是佇我出門了後才吐，按呢我會等甲下晡才請假....就有可能貓ê膀胱已經漲甲破去矣。 有可能因為我一下失覺察，貓咪就無命矣！ 愈想愈驚....愈想愈驚.... 啊！佳哉伊這久佇病院，有醫護人員咧照顧，予伊ê痛苦得著減輕。 下班想欲閣去病院看貓咪，敲電話共阿勳講，伊煞講伊下晡已經去看過矣！ 阮兩个..疼這隻貓，像咧疼一个囡仔。 我想，飼貓ê人，應該攏是這款心情 人總是講...春天上媠。 無影！ 心肝像載ê彼kha無貯貓仔ê貓籠仔，空空！ 今仔日立春，春天、一點仔都無媠！ 貓咪若出院轉來，tō會有一个美麗ê春天。 貓咪！等汝..... 後記：佇情人節前一日.....2月13中晝.住院11工的貓咪...離開去矣！
|
|
| ( 心情隨筆｜心靈 ) |
