 
字體：小 中 大 |
|
|
|
| 2017/12/10 13:20:45瀏覽218｜回應0｜推薦2 | |
|
借過
2017.1.27
我若是駛車抑是騎機車，攏足無愛倒斡，大概是無耐心等青紅燈的關係吧！
偏偏仔上班的時，若是行大通路，會一直倒斡閣倒斡，為著欲減一兩个仔倒斡，我這馬攏踅入去庄內的農路；安靜、曠闊閣綠色充滿。 若無欲倒糞帚，就倒斡頭1條小路仔，若紮一包糞帚欲掞，著愛過平交通倒斡第2條小路。啊若行到第3條小路仔才倒斡，彼tō表示有較早出門，嘛免倒糞帚，雖然著加踅成公里外的路，毋拘因為會經過明德橋，好天的時，東爿山一遍像琉璃，真愛看，所以若空氣無予pm2.5(細懸浮微粒)占領，我甘願加踅寡仔遠路；可惜橋頂機車道真狹，袂當停落來翕相，閣再講，斗六的天氣好甲會當著明明明的山嶺，一年嘛無幾工…..唉！所以，行倒斡第3條小路仔的機會無濟。 過年到矣，毋知按怎糞帚特別濟，差不多逐工都著倒。 這日，上班時間，青紅燈跤停一排車等青燈，邊仔機車閣一直淪過來….閃啊閃，拜託借過、借過拜託！真無簡單閃入去第1條倒斡。 專心咧閃車、借過、多謝。 斡入去農路，看著闊闊的田園，心情做一下輕鬆起來，才發覺..機車跤踏枋有1包糞帚…..這聲，著閣踅翻頭，閣一遍閃車、借過、多謝！ 遐个看我斡入去小路的車輛，都猶未徙半步咧！閣騎過怹車邊，面燒烘烘，因為歹勢家己的糊塗。 往過囡仔細漢的時，阿勳做齒模的工作量，過年時仔加倍濟，工課開始無閒的時，阿爸會來共阮的囡仔tshuā轉去外家寄飼一站仔，過年前一、兩日，阿爸才閣共囡仔tshuā轉來予阮全家團圓。 阿爸攏會叮嚀我，年關、人心浮動，出入著較細膩咧。 做阿爸查仔囝，毋捌看阿爸緊張過。 Tō算阿爸第1个發現厝內淹水，伊嘛是勻仔是，共厝裡的人攏叫精神，才khû（蹲）倚床墘，共我偝咧走予水jiok！彼陣仔是我高中一年仔歇熱。 阿爸個性內底鎮靜的基因，我一點仔都無抾著。 佳節又思親；這遍，我無欲問，阿爸、汝好否？ 因為我相信伊參伊呀佇天頂，咧看護阮、保庇阮平安，等待...閣再參怹見面彼一工！ 只是佇遮，想欲順煞共阿爸講，4伯去天頂矣。伊毋肯等甲過年過，就走矣。 才會記得頂日仔參4伯見面 伊共阮講：恁阿爸犯規... ：按怎講？ 應講：恁三伯過身了，我都一直咧等，照排、是著我，哪知恁阿爸偷走，比我較早去！ 阮共講：4伯，你會食百二！ 想袂到，年底，就送走阿爸彼沿上落尾這位長輩！ 閣想起阿爸彼句話：食甲這个歲，拄著啥代誌攏免感覺意外。 世間..本成就是借過的人生
~ ~新年平安！！！ |
|
| ( 心情隨筆｜心靈 ) |
