 
字體：小 中 大 |
|
|
|
| 2017/12/08 21:56:40瀏覽192｜回應0｜推薦3 | |
|
煮食無障礙
2016.12.17 人生若拄著逆境，二姐攏會安慰我；這是慈佛出ê功課！
年初肩胛頭疼甲影響著睏眠，咱想講，啊tō跤袂行，逐項使手去做，疼，是袂當避免ê結果。 誰知愈疼愈毋是款，肩胛頭、頷仔頸到頭殼碗，愈湠愈闊。敢是蒼天寄來上落尾ê一張批？按呢著緊來去病院領一个病名，通好去報到。 親切ê曾醫師講：汝汰會遮gâu忍？頭殼ê疼是肩胛牽起來ê啦！ 頭疼若有原因，應該就毋是蒼天上落尾一張批嘍。 連續一禮拜去處理肩胛頭，疼、猶是蠻皮趕毋走。 問另外一个來處理肩胛ê醫生，哪閣遮疼？ 伊應講：汝手都毋歇睏，欲哪會好！ 我聽一下，放棄一日一兩點外鐘ê治療；叫我手歇睏，就若像叫我ê跤起來行共款ê困難... 為著暗時欲睏一下，開始食止疼劑。 彼陣仔拄好春天，透南風，辦公大樓塗跤滑溜siuh，著足細膩徙跤步，行幾步仔，規身軀汗。手、閣較疼。 二姐叫我坐輪椅較安全。我共二姐講：心理有障礙，輪椅坐袂落去呢！ 二姐應我講：路裡ê人真無閒，無人咧看汝是舉枴仔、抑是坐輪椅。 『一語驚醒疼痛人』，好！共坐落去。佇辦公室攢一台輪椅、佇厝裡嘛開始坐輪椅做工課。 坐一站仔，止疼藥仔就開始會使減量矣。 坐輪椅好是好，厝裡設備袂拄好。 洗碗槽仔siuⁿ懸，洗碗洗菜袂四序。 唸講：來共水槽仔敲掉重做。 阿勳聽我按呢講，就去輔具中心請人來設計，水槽仔著做偌闊、偌懸才會方便坐輪椅使用。 輔具中心ê人來看，伊講，真少人欲做灶跤ê無障礙呢，一般攏是浴間仔。 我問伊：按呢煮食欲怎處理？ 應講：一般是倩外勞來做家事。 輔具中心ê工作人員遮比、遐量。建議規格了後，予阮一張廠商ê參考名單，名單內底是有經驗做無障礙設備ê廠商。 阿勳一間一間敲電話去詢問。 有ê聽講做水糟仔爾，一聲就講怹無咧做。 有塗水師來看了、建議阮去揣賣水槽仔ê店頭。 去揣賣水槽仔ê店頭；伊煞叫阮去揣做塗水師。 揣甲碰壁；我共阿勳講，莫揣矣，勉強用就好啦！ 伊毋死心，繼續揣.... 總算揣著一个營造業ê生理人 伊tshuā做水電ê佮做塗水ê來看... 原來做水槽仔，毋是干單做水槽仔爾；著愛動著水道、嘛愛共本成khōng紅毛塗ê水槽仔敲掉。 真濟人嫌厚工趁少，無欲接！ 後來、總算有一組肯接矣。 彼早起，塗水師駛一台鐵牛仔敲水槽仔，敲一半，家私歹去，伊講欲去市內買家私。 鐵牛仔噗、噗、噗，駛出去！ 無偌久閣噗、噗、噗轉來矣，講店頭家私欠貨，袂當繼續做！ 這聲，灶跤若予銃彈著，頭洗一半無水矣彼種ê感覺！ 後來家私來矣，繼續做.... 彼个塗水師真大箍，敲水槽仔閣袂當吹電風，看伊大粒汗細粒汗，誠辛苦。 敲了，講欲去款料，鐵牛仔噗、噗、噗又閣出去矣！ 轉來，共阮講；莫貼thài-luh！【瓷磚】 當初講好，敲了ê壁著貼thài-luh，按呢較好整理，伊講毋貼，阮抑毋敢勉強伊。 後來營造商敲電話參伊講電話了，講伊欲去買thài-luh，我毋知影其中ê變化是啥原因，總是..後來敲了、清了，thài-luh嘛貼落去矣。 塗水師做好離開無偌久，營造商來看。 煞共倚灶台ê thài-luh拆拆掉，伊講按呢空間無夠，水槽仔囥袂落。 暗頭仔，厝邊相招來看阮灶跤工程做了按怎，看著thài-luh拆掉彼爿tsho͘-pa-lī-haiⁿ，講按呢袂使得啦，著叫塗水閣來抺予平。我嘛感覺無平ê壁堵，會生虼蚻遐个有ê無ê。敲去予營造商，伊叫阮家己參塗水師講。 咦？！哪會按呢？工課上，阮是交予營造商，其他ê是伊去倩ê呢。 阮隔壁是咧共人做大理石ê，講伊遐有白紅毛塗（奇怪、白紅、毛塗？啊！橫直就是紅毛塗白色ê）。伊欲來替阮抺。阿勳歹勢麻煩人，就共伊ê白紅毛塗留落來，阿勳家己落去抺。 看伊坐佇塗跤遐，舞點外鐘，才共彼堵tsho͘-pa-lī-haiⁿê壁抺平、抺白！ 抺了，阿勳講塗水師遐大箍，叫伊khut佇遐抺彼堵壁，其實嘛真為難伊！ 第2工，水槽仔裝落去，等水電ê來徙水道頭。 水道頭裝好，人走去矣。 才發覺，水道頭siuⁿ長，tsūn大港水會噴甲滿四界。 敲電話予水電ê，請伊來共水道頭徙較正手爿，會較四序。伊應講，伊是掠正中央，較好看！ 就是講，伊無做毋著，無欲修改。 阿勳講，該當著愛加偌濟錢，阮會予伊。伊嘛無欲來。 這聲、是欲按怎？ 我講無要緊啦，我使用ê時較細膩咧就好。 阿勳個性求完美，按呢伊看袂落去。 又閣親身出馬。 徙水道頭咱袂曉，去買一个較短的來換，無問題。 伊去大賣場買，家己換！ 阮行動無方便，家己換水道頭，走出、走入，禁水、開水，真費氣。總是，家己種一欉，較贏靠別人。佳哉閣有才調家己解決一寡仔細項代誌，若無、用著一定真礙虐【gāi-gio̍h】。 這幾工，換一台瓦斯爐。這是成家了後ê第3台；想想咧，一世人，三台瓦斯爐大概嘛用袂完。 灶跤成做無障礙，煮飯、洗碗加真好勢。 聽學妹講，伊ê同學是坐佇輪椅扶手咧炒菜，雖然講炒了真好食，毋拘我聽著足毋甘。 阿母在生ê時，若來我遮，攏講伊毋甘我跤無方便閣煮予食。我彼時是坐佇椅仔煮飯，會共應講：伊呀！無人像我遮好命啦，坐咧煮呢！ 這馬，伊呀若閣佇咧，看我灶跤閣較方便矣，大概就袂hiah毋甘我煮啦！ 啊！我若無較早做一个無障礙ê灶跤，予阿母看我款三頓是遮呢好勢、四序。 共殘黨ê朋友，無障礙ê生活著量早做，因為...隨歲月加添，咱ê跤，一定是會較傷重、袂較輕可！ 跤步愈行愈重拖，人生ê功課，愈來愈歹寫，甘願承受所有的拖佮磨，干單希望蒼天莫予阮落台ê身影，siuⁿ歹看！
|
|
| ( 心情隨筆｜心靈 ) |
